शिकागोपछि अध्यागमन कारवाही न्यूयोर्कमा केन्द्रित हुने खुलासा
प्रकाशित मिति : माघ ८, २०८१ मंगलबार
अमेरिकी राष्ट्रपति डोनाल्ड ट्रम्पले आप्रवासन सम्बन्धी कार्यकारी आदेशहरू जारी गरेपछि न्यूयोर्ककी एक सांसदले न्यूयोर्क सिटीमा चाँडै नै ठूलो मात्रामा देशनिकाला सुरु हुने बताएकी छन्।
ट्रम्पको सपथ ग्रहणपछि दिइएको एक अन्तर्वार्तामा, रिपब्लिकन सांसद निकोल मालिओटाकिसले आइस निर्देशक टम होम्यानसँग योजनाबद्ध डिपोर्टेशनबारे छलफल भएको खुलासा गरेकी छन्।
शिकागो पहिलो रहेको र त्यसपछि न्यूयोर्क तुरुन्तै आउने उनले बताएकी छन्। तर कति दिन लाग्छ भन्ने आफूलाई थाहा नभएको उनले बताइन्।
देशनिकाला अपराधीहरूमाथि केन्द्रित रहेको र कार्टेलहरू, गिरोहका सदस्यहरू, मानव तस्करहरू, तथा लागुऔषध तस्करहरूलाई लक्षित गरिएको उनले बताइन्। ट्रम्प प्रशासनले यी खतरनाक व्यक्तिहरूलाई देशबाट हटाउन चाहेको उनको भनाइ छ।
ट्रम्पद्वारा दक्षिणी सिमानामा राष्ट्रिय आपत्काल घोषणा गरिनुले उनलाई सिमाना पर्खाल बनाउनका लागि अरबौं डलरको कोष प्रयोग गर्ने सम्भावना दिएको छ। ट्रम्पले “रिमेन इन मेक्सिको” नीतिलाई पुनः लागू गर्ने इच्छा व्यक्त गरेका छन्, जसले आप्रवासीहरूलाई उनीहरूको अदालत सुनुवाइको प्रतीक्षा गर्दा मेक्सिकोमै बस्न बाध्य पार्नेछ।
सोमबार, ट्रम्पले जन्मसिद्ध नागरिकताविरुद्धको कार्यकारी आदेशमा पनि हस्ताक्षर गरेका छन्। यद्यपि, यो संविधानको १४औं संशोधनको भाग भएकाले यसलाई बदर गर्न संवैधानिक संशोधन आवश्यक पर्नेछ।