विश्व स्वास्थ्य संगठनका प्रमुख विमान चढ्नै लाग्दा यमनमा इजरायलको आक्रमण
प्रकाशित मिति : पुस ११, २०८१ बिहीबार
इजरायली सेनाले यमनको राजधानी सानआ र पश्चिमी शहर होडैदाहमा श्रृंखलाबद्ध आक्रमण गरेको छ ।
हमलामा कम्तीमा ६ जनाको मृत्यु भएको छ । दर्जनौं घाइते भएको इरान समर्थित हुथी समूहले जनाएको छ । हुथीहरुले यस आक्रमणको बदला लिने चेतावनी दिएका छन ।
सानआ अन्तर्राष्ट्रिय विमानस्थलमा गरिएको आक्रमणमा कम्तीमा तीन जनाको मृत्यु भएको बताइएको छ । ३० जना घाइते भएका छन ।
विश्व स्वास्थ्य संगठन WHO का महानिर्देशक टेड्रोस अधानोम गेहब्रेयससले आफू र संयुक्त राष्ट्रसंघको टोली विमान चढ्नै लाग्दा विमानस्थलमा हमला भएको बताएका छन ।
सानआबाट विमान चढ्न लाग्दै गर्दा विमानस्थलमा हवाई हमला भयो चालक दलका एकजना सदस्य घाइते भए गेहब्रेयससले भनेका छन ।
विमानस्थलको एयर ट्राफिक कन्ट्रोल टावर, प्रस्थान स्थल , रनवे क्षतिग्रस्त भएको छ उनले भनेका छन ।
संयुक्त राष्ट्रसंघको प्रतिनिधिमण्डल यमनमा संयुक्त राष्ट्रसंघका बन्दी कर्मचारीहरूको रिहाइका लागि वार्ता गर्न र त्यहाँको स्वास्थ्य तथा मानवीय स्थितिको मूल्यांकन गर्न पुगेको थियो।
WHO को तर्फबाट टेड्रोसले आक्रमणमा ज्यान गुमाएका व्यक्तिहरूका परिवारलाई समवेदना व्यक्त गरेको विज्ञप्तिमा उल्लेख छ ।
होडैदाहका बन्दरगाहहरू र रस इस्सा तथा रस कुटुब पावर स्टेशनमा आक्रमण भएको हुथी विद्रोहीहरुले बताएका छन । यो आक्रमणमा कूल ४० जना घाइते भएका छन ।
इजरायली सेनाले गरेको आक्रमण इरान समर्थित हुथीहरुको सैन्य लक्ष्यमा केन्द्रित भएको बताएको छ । इजरायलका प्रधानमन्त्री बेन्जामिन नेतान्याहुले यमनमाथिको आक्रमण मिसन पूरा नभएसम्म नरोकिने बताएका छन ।
हुथीहरूले पछिल्लो केही महिनामा इजरायलमा मिसाइल प्रहार गर्दै आएका छन् । जसलाई उनीहरूले गाजामा इजरायली आक्रमणको जवाफ भनेका छन् ।
गाजामा इजरायली आक्रमणपछि इजरायली सेनाले बारम्बार यमनमा हमला गरिरहेको छ । हुथीहरूले गाजाको युद्धको अन्त्य नभएसम्म इजरायल र यसको सहयोगीहरूमाथि आक्रमण जारी राख्ने बताइरहेका छन ।
अमेरिका र बेलायतले यसअघि हुथीहरूलाई रेड सीमा जहाज अवरोध गरेपछि आक्रमण गरेका थिए । रेड सी विश्वकै व्यस्त जलमार्गमध्ये एक हो ।
अमेरिकी विदेश मन्त्रालयले हुथीहरूलाई वैश्विक आतंकवादी संगठनका रूपमा वर्गीकृत गरेको छ ।