अमेरिकाद्धारा यमनको राजधानीमा हवाई हमला, हुथी लडाकुको मिसाइल भण्डारण स्थल ध्वस्त
प्रकाशित मिति : पुस ६, २०८१ शनिबार
अमेरिकी सेनाले यमनको राजधानी सनामा शृङ्खलाबद्ध हवाई आक्रमण गरेको छ । इरान समर्थित हुथी लडाकूहरूद्वारा सञ्चालित मिसाइल भण्डारण स्थल र कमाण्ड सुविधाहरूलाई लक्षित गरेर अमेरिकाले हमला गरेको हो ।
अमेरिकी सेनाको केन्द्रीय कमाण्ड ले रेड सी मा हुथीका धेरै ड्रोनहरू र एउटा एन्टी शिप क्रुज मिसाइललाई पनि नष्ट गरिएको बताएको छ।
उत्तरपश्चिम यमन नियन्त्रणमा लिएको इरान समर्थित हुथी विद्रोही समूहले अक्टोबर २०२३ मा गाजाको युद्ध सुरु भएदेखि इजरायल र अन्तर्राष्ट्रिय जहाजहरूमाथि आक्रमण गर्न थालेको हो ।
उनीहरूले प्यालेस्टिनीहरूसँग ऐक्यबद्धता जनाउन आक्रमण गरेको दाबी गरेका छन्।
अमेरिकी सेनाले दक्षिणी रेड सी खाडीमा अमेरिकी नौसैनिक जहाजहरू र व्यापारिक जहाजहरू विरुद्धका हुथी आक्रमणहरूलाई अवरोध र कमजोर बनाउने उद्देश्यले यी आक्रमणहरू गरिएको बताएको छ ।
अमेरिकी सेनाले हुथीका एकतर्फी हमला गर्न प्रयोग गरिने ड्रोनहरू र एन्टी शिप क्रुज मिसाइलहरूलाई रेड सी मा निशाना बनाएको जानकारी दिएको छ।
यो अपरेशनमा अमेरिकी एफ ए १८ होर्नेट फाइटर जेटहरूको प्रयोग गरिएको थियो ।
यो घटनाको केही घण्टापछि हुथीले इजरायलतर्फ एउटा ब्यालिस्टिक मिसाइल प्रहार गरेको थियो । तेल अभिवको एउटा पार्कमा भएको मिसाइल प्रहारबाट १२ भन्दा बढी व्यक्ति घाइते भएका छन ।