अमेरिकाले भन्यो : सिरियामा सत्ता फालेका विद्रोही प्रत्यक्ष सम्पर्क छन्
प्रकाशित मिति : मंसिर २९, २०८१ शनिबार
अमेरिकाले सिरियामा राष्ट्रपति बसर अल असदको शासन समाप्त गरेपछि सत्तामा आएको विद्रोही समूह हयात तहरिर अल शाम (एचटीएस)सँग प्रत्यक्ष सम्पर्क गरेको छ । अमेरिकाका विदेश मन्त्री एन्टोनी ब्लिंकेनले यो जानकारी दिएका हुन् ।
ब्लिंकेनले यो स्वीकारोक्ति जोर्डनमा अरु अरब मुलुकहरू, टर्की र युरोपका प्रतिनिधिसँग सिरियाको भविष्यबारे वार्ता गर्न आयोजित बैठकपछि दिएका हुन् । बैठकमा सिरियाको शान्तिपूर्ण संक्रमण प्रक्रियालाई समर्थन गर्ने सहमति भएको थियो ।
जोर्डनका विदेश मन्त्रीले क्षेत्रीय शक्तिहरूले सिरियालाई अराजकतामा जान नदिन चाहेको बताएका छन् ।
बैठकपछिको संयुक्त विज्ञप्तिमा सबै सिरियालीलाई प्रतिनिधित्व गर्ने र अल्पसंख्यकका अधिकारहरूको सम्मान गर्ने सरकारको आवश्यकता रहेको उल्लेख गरिएको छ ।
हालैका घटनाहरूपछि सिरियामा नयाँ शासन व्यवस्था स्थापना गर्नुपर्ने महत्वको कुरा भइरहेकामा जोर्डनको बैठकमा इराकका विदेश मन्त्री फुआद हुसेनले पनि चिन्ता व्यक्त गरे ।
उनले क्षेत्रीय मुलुकहरूले सिरियालाई अर्को लिबिया बन्न दिन नहुने बताएका छन् । एचटीएसका नेताहरूले समावेशी सरकारको चाहना व्यक्त गरे पनि यसको हिंसात्मक विगतले उनीहरूलाई विश्वास गर्न कठिन बनाएको छ ।
ब्लिंकेनले हराइरहेका अमेरिकी पत्रकार अष्टिन टाइसको विषयमा पनि एचटीएससँग प्रत्यक्ष संवाद भइरहेको जानकारी दिए ।
जोर्डनको बैठकमा सिरियाका कुनै पनि प्रतिनिधि उपस्थित थिएनन् । उपस्थित आठ अरब देशका विदेश मन्त्रीहरूले सिरियालाई विभाजन हुन नदिई एकताबद्ध बनाउन जोड दिएका थिए ।
असदलाई लामो समयसम्म सत्तामा टिकाउन सहयोग गर्ने दुई मुलुक ( इरान र रुस ) पनि बैठकमा अनुपस्थित थिए।
८ डिसेम्बरमा सिरियाली विद्रोहीहरूले असदको २४ वर्ष लामो शासन समाप्त गरेका थिए । राजधानी कब्जा गरेपछि असद रूस भागेका थिए। सिरियामा १३ वर्षसम्म चलेको गृहयुद्धले पाँच लाखभन्दा बढी मानिसको ज्यान लिएको थियो । लाखौं विस्थापित भएका थिए ।
एचटीएसका नेता अहमद अल शराअ ले मोहम्मद अल बशीरलाई सिरियाको अन्तरिम प्रधानमन्त्री नियुक्त गरेका छन् ।
विश्वले असद परिवारको आधा शताब्दी लामो शासनपछिको सिरियाको राजनीतिक भविष्यलाई नजिकबाट हेरिरहेको अमेरिकाले बताएको छ ।