एनपिएलमा चल्न नसकेको कुशलको ‘ब्याट’
प्रकाशित मिति : मंसिर २०, २०८१ बिहीबार
राजधानीमा जारी नेपाल प्रिमियर लिग (एनपिएलमा) टोली पोखरा एभेन्जर्सले लगातार दोस्रो हार भोगेको छ ।
बिहीबार त्रिवि क्रिकेट मैदान कीर्तिपुरमा जनकपुर बोल्ट्ससँग ७ विकेटले पराजित भएसँगै पोखरा एभेन्जर्सले दोस्रो हार खेप्नुपरेको हो । पोखरा एभेञ्जर्सले जितका लागि दिएको एक सय ३९ रनको लक्ष्य जनकपुरले १७ दशमलव एक ओभरमा तीन विकेट गुमाउँदै पूरा गरेको हो ।
पोखरा एभेन्जर्सले जारी एनपिएलमा सुरुवात पनि राम्रो गर्न सकेन् । आफ्नो पहिलो खेलमै पोखराले चितवन राइनोजसँग ८७ रनको फराकिलो अन्तरले हार्न पुगेको थियो ।
कप्तान भुर्तेलको चल्न नसकेको ब्याट
पोखरा एभेन्जर्सका कप्तान तथा मार्की खेलाडी हुन्, नेपाली राष्ट्रिय क्रिकेट टोलीका ओपनर कुशल भुर्तेल । एनपिएलमा कुशलको प्रदर्शन खासै राम्रो भने हुन सकेन् ।
जारी एनपिएलमा कुशलको ब्याट मैदानमा जम्न सकेन् ।
आफ्नो पहिलो खेलमा चितवन राइनोजविरूद्ध ब्याटिङतर्फ उनी पहिलो बलमै आउट हुन पुगेका थिए । चितवनसँगको खेलमा बलिङतर्फ पनि एक ओभरमै १० रन खर्चिएका थिए । तर, खेलमा उनले तीन वटा क्याच भने समातेका थिए ।
दोस्रो खेलमा पनि जनकपुर बोल्ट्सविरुद्ध उनी चल्न सकेनन् । उनी जनकपुरविरुद्ध ६ बलमा एकचौका प्रहार गर्दै ६ रन मात्रै बनाएर आउट हुन पुगे ।
बलिङतर्फ पनि दुई दशमलव एक ओभरमा १८ रन खर्चिदैँ एक विकेट मात्रै हात पारे ।
अझैँ पाँच खेल बाँकी छ : कप्तान भुर्तेल
पोखरा एभेन्जर्सका कप्तान भुर्तेलले अझै ५ खेल बाँकी रहेकोले अन्य खेलमा राम्रो प्रर्दशन गर्ने बताउनुभयो । उहाँले आगामी ४/५ वटा खेलमा राम्रो प्रदर्शन गर्न सके अगाडी बढ्न सक्ने जिकिर गर्नुभयो ।
खेलपछि सञ्चारकर्मीहरुसँगको कुराकानीमा उहाँले आजको खेलको अन्तिम ओभरमा १५ रन थप जोड्न नसकेको बताउनुभयो । उहाँले अन्तिम ओभरमा १५ रन जोड्न सकेको भए खेलले अर्कै रुप लिने अर्कै मोड लिने धारणा राख्नुुभयो ।