एनपीएल : उपाधि हात पार्ने दाऊमा लुम्बिनी लायन्स
प्रकाशित मिति : मंसिर १३, २०८१ बिहीबार
पहिलो संस्करणको नेपाल प्रिमियर लिग (एनपीएल) यहीँ मङ्सिर १५ गतेदेखि सुरु हुँदै छ । प्रतियोगिता हुन तीन दिन बाँकी रहँदा एनपीएलमा सहभागी ८ टोलीले अभ्यासलाई तीव्रता दिइरहेका छन् ।
नेपाली राष्ट्रिय क्रिकेट टोलीका कप्तान रोहित कुमार पौडेल मार्की खेलाडी रहेको लुम्बिनी लायन्सलाई उपाधिको दाबेदारको रूपमा हेरिएको छ । फर्चुन हेल्थ केयर प्रालिको स्वामित्वमा रहेको लुम्बिनी लायन्सले पनि उपाधि जित्ने लक्ष्यसहित आन्तरिक रूपमा टिमलाई बलियो बनाइरहेको छ । लुम्बिनीले ७ दिनसम्म रुपन्देहीको एक्ट्रा टेक ओभल क्रिकेट स्टेडियममा अभ्यास पनि गरिसकेको छ ।
को–को छन् स्वदेशी खेलाडी ?
रोहित मार्की खेलाडी रहेको लुम्बिनी लायन्स सन्तुलित छ । टिममा रोहितसहित अलराउण्डर विवेक यादव, विकास आग्री, अभिषेक गौतम छन् । यस्तै, ब्याट्सम्यानतर्फ दिनेश अधिकारी, आयुतोष धिरैया, सन्दीप जोरा छन् भने बलिन तर्फ सूर्य तामाङ, दुर्गेश गुप्ता, तिलक भण्डारी र विकेटकिपर अर्जुन साउद छन् ।
अर्जुन साउद, सन्दीप जोरा, विवेक यादव र सूर्य तामाङ नेपाली राष्ट्रिय टोलीबाट खेलिसकेका खेलाडी हुन् । यस्तै, दुर्गेश गुप्ता, तिलक भण्डारी अन्डर १९ टिमबाट खेलिसकेका छन् भने आयुतोष धिरैया नेपाली ‘ए’ टिमबाट खेलिसकेका छन् ।
लुम्बिनी लायन्सको आइकोनिक खेलाडीको रूपमा आरिफ शान छन् ।
प्रधानमन्त्री केपी शर्मा ओलीले गत सोमबार नेपाल प्रिमियर लिग (एनपीएल)को ट्रफी सार्वजनिक कार्यक्रममा लुम्बिनी लायन्सका रोहित पौडेलको नाम सुन्दै गर्व लाग्ने भन्दै प्रशंसा गर्नुभएको थियो । जसले जिते पनि रोहितलाई फाइदा हुने भन्दै प्रधानमन्त्री ओलीले नेपाली क्रिकेटका कप्तान भएको नाताले उनले जितेकै हुने धारणा राख्नुभएको थियो ।
“लुम्बिनी लायन्सका रोहित पौडेलको नाम सुन्यो कि मलाई गर्व लाग्छ । रोहितको कप्तानीले लुम्बिनीको भावना मैदानमा देख्नेछ । जसले जिते पनि रोहितलाई फाइदा छ, आखिर देशले जित्छ र नेपाली क्रिकेटका कप्तान भएको नाताले उनले जितेकै हुनेछन् ।”, प्रधानमन्त्री ओलीले भन्नुभयो ।
चर्चित विदेशी खेलाडीहरूको प्रवेश
लुम्बिनी लायन्समा अस्ट्रेलियन अलराउन्डर बेन कटिङ भित्रिसकेका छन् । ३७ वर्षीय कटिङ दायाँ हाते ब्याटर र मध्यम तीव्र गतिका बलर हुन् । सन् २०१६ मा उनी सहभागी सनराइजर्स हैदराबादले इन्डियन प्रिमियर लिग (आइपिएल) को उपाधि जितेको थियो भने फाइनल खेलको म्यान अफ दि म्याच पनि उनै बनेका थिए ।
लुम्बिनीबाट इंग्ल्याण्डका विकेटकिपर तथा ब्याट्सम्यान टम मूर्स पनि खेल्दै छन् भने बार्बाडियन फास्ट बलर रामोन सिमन्ड्स पनि लुम्बिनीमै छन् ।
लुम्बिनीले भारतीय युवा क्रिकेटर उन्मुक्त चन्दलाई अनुबन्ध गरिसकेको छ । चन्दको कप्तानीमा भारतले सन् २०१२ को यु–१९ विश्वकपको उपाधि हात पारेको थियो । यु–१९ को फाइनलमा खेलमा चन्दले शतक समेत प्रहार थिए । उनी आइपिएल स्टार समेत हुन् ।
क्यानडाका पूर्व कप्तान तथा कीर्तिमानी अलराउण्डर साद बिन जफर पनि लुम्बिनीबाटै एनपीएल खेल्दै छन् । टी–२० आई क्रिकेटमा ४ ओभरको बलिङ स्पेलमा १ रन पनि नदिई कीर्तिमान बनाउने विश्वकै पहिलो बलर समेत हुन् ।
अनुभवी प्रशिक्षक
लुम्बिनी लायन्समा मुख्य प्रशिक्षकको रूपमा भारतीय नन्दन फाडनिस नियुक्त भइसकेका छन् । नेपालको राष्ट्रिय क्रिकेट टिमलाई प्रशिक्षण गरिसकेका फाडनिससँग राम्रो अनुभव पनि छ ।
उनी सन् २०१६ मा गोवा क्रिकेट सङ्घको अधिकार क्षेत्र अन्तर्गतका क्रिकेट टोलीका लागि प्रशिक्षक नियुक्त भएका थिए । उनले भारतीय क्रिकेटर उन्मुक्त चन्दलाई ब्याटिङको प्रशिक्षण समेत दिएका थिए । उनी २०२३ मा नेपाली राष्ट्रिय क्रिकेट टोलीका लागि परामर्श प्रशिक्षक नियुक्त भएका थिए ।
यस्तै, लुम्बिनीको कन्सलट्यान्ट प्रशिक्षकमा राष्ट्रिय टिमका पूर्व खेलाडी शक्ति गौचन हुनुहुन्छ ।
लुम्बिनी लायन्सको ब्रान्ड एम्बासडरमा नेपाली चलचित्रका महानायकका रूपमा परिचय बनाउनुभएका राजेश हमाल हुनुहुन्छ ।
सिद्धार्थ बैङ्क नेपाल प्रिमियर लिग (एनपिएल) को पहिलो संस्करण मङ्सिर १५ अर्थात् आगामी शनिबारदेखि सुरु हुँदै छ ।
एनपीएलमा लुम्बिनी लायन्ससहित विराटनगर किंग्स, जनकपुर बोल्ट्स, चितवन राइनोज, काठमाडौँ गोर्खाज, पोखरा एभेन्जर्स, कर्णाली याक्स र सुदूरपश्चिम रोयल्स सहभागी छन् ।
लुम्बिनीले एनपीएलमा पहिलो खेल मङ्सिर १९ गते विराटनगर किङ्ग्ससँग खेल्दै छ । यो खेल त्रिवि क्रिकेट मैदान कीर्तिपुरमा दिउँसो सवा एक बजे सुरु हुनेछ ।