मेरिल्याण्डमा शान्तलाल प्रधान मृत फेला, जो केहीबर्ष अघि टेक्सासमा बन्दुकधारीबाट लुटिएका थिए
प्रकाशित मिति : भाद्र १६, २०८१ आईतबार
अमेरिकाको मेरिल्याण्डमा एक नेपाली आफ्नै कोठामा मृत भेटिएपछि शव नेपाल पठाउन गोफण्डमी सुरु गरिएको छ । ४७ बर्षिय प्रधान मंगलबार मृत भेटिएको जनाइएको छ । उनको मृत्युको कारण केही खुलेको छैन ।
भरतपुरमा गणित शिक्षक समेत रहेका उनी आफ्नो परिवारको लागि उज्ज्वल भविष्य सुरक्षित गर्ने आकांक्षाका साथ २०१५ मा अमेरिका आएको गोफण्डमीमा जनाइएको छ । अमेरिकामा रहँदा उनले धेरै अवरोधहरू सामना गरेको तथा केही वर्ष पहिले टेक्सासमा बन्दुकधारीबाट लुटिएको समेत जनाइएको छ ।
२०१९ उनी न्यूरोलोजिकल रोगबाट पीडित भएका थिए जसका कारण उनी ६ महिनाभन्दा बढी ओछ्यानमा सीमित रहनु परेको थियो । उनी सबै कठिन संघर्षका बीच आफ्नो सपनालाई कहिल्यै हार नमानेको तथा आफ्नो परिवार खर्च, ऋण र छोराछोरीको ट्युसन शुल्क तिर्दै आएका गोफण्डमीमा उल्लेख छ । उनी छिट्टै आफ्नो ट्राभल डकुमेन्ट प्राप्त गरेर ९ बर्षपछि परिवार र साथीहरूलाई भेट्न नेपाल जाने योजनामा थिए ।
यदि तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
उनको शवलाई नेपाल पठाउने र परम्परा अनुसार अन्तिम संस्कार गर्नको लागि गोफण्डमी सुरु गरिएको उल्लेख गर्दै सबैलाई सहयोगका लागि आव्हान गरिएको छ । उनकी पत्नी नेपालमा छिन् भने छोरी विद्यालयमा अध्ययनरत छिन् । छोराले भर्खर आफ्नो क्यारियर सुरु गर्दैछन् ।
सङ्कलन गरिएको रकम शव नेपाल पठाउने खर्चहरू कभर गर्न प्रयोग गरिनेछ । बाँकी रकम यस कठिन समयमा अन्त्येष्टि खर्च र अन्य आर्थिक आवश्यकताहरूलाई सहयोग गर्न नेपालका शोकसन्तप्त परिवारलाई सिधै हस्तान्तरण गरिने जनाइएको छ ।