आलुको बीउ स्थानीय सरकारले खरिद गरिदिएपछि किसान खुशी
प्रकाशित मिति : श्रावण २४, २०८१ बिहीबार
पर्वतको जलजला गाउँपालिकाले किसानले फलाएको आलुको बीउ खरिद गरिदिएको छ । किसानले गत आर्थिक वर्षमा आलुको मूल बीउ उत्पादन गरेका थिए । उक्त आलु पालिकाले नै खरिद गरेपछि किसानलाई राहत मिलेको छ ।
१० लाख ७५ हजारभन्दा बढी मूल्य बराबरको आलुको बीउ पालिकाले खरिद गरेको छ । जलजला–६ शालिजाका ३ कृषक समूहले उत्पादन गरेको ३५ हजार ४ सय ७० किलोग्राम बीउ आलु उक्त स्थानीय तहले खरिद गरेको हो ।
बीउ आलु बिक्री गरेका किसानलाई १० लाख ७५ हजार ४ सय ७० भुक्तानी गरेको गाउँपालिकाको कृषि शाखाका अधिकृत राजु गौतमले जानकारी दिनुभयो ।
प्रगतिशील बीउ उत्पादक कृषक समूहले उत्पादन गरेको २ हजार २ सय ७० किलोग्राम मूलबीउ प्रतिकिलो ३५ का दरले ७९ हजार ४ सय ७० मा खरिद गरेको छ ।
नमूना र प्रगतिशील बीउ उत्पादक कृषक समूहले उत्पादन गरेको ३३ हजार २ सय किलोग्राम पहिलो पुस्ताको बीउ ९ लाख ६ हजारमा खरिद गरेको हो ।
बीउ उत्पादन गर्ने सबै किसानलाई जलजलाले नगद उपलब्ध गराएको छ । किसानबाट खरिद गरेको बीउ पोखरामा रहेको चिस्यानगृहमा भण्डारण गरिएको छ ।
बीउ, मल र उत्पादन सामग्री उपलब्ध गराउने गाउँपालिकाले किसानले उत्पादन गरेको आलुको मूल बीउ पनि खरिद गरिदिएको हो ।
गाउँपालिकाले किसानबाट बर्खायाममा खरिद गर्ने बीउ चिस्यानगृहमा भण्डारण गर्ने र हिउँदमा उनीलाई नै बिक्री गर्ने गरेको छ । आलुको बीउ बिक्री गरेर जलजला गाउँपालिकाले गत आव २०८०/८१ मा २९ लाख ७१ हजार आम्दानी गरेको छ ।
गाउँपालिकाको आन्तरिक आम्दानीको २२ प्रतिशत आलुको बीउ बेचेर भएको हो ।
जलजला गाउँपालिकाका अध्यक्ष राजुप्रसाद आचार्यले आलुको गुणस्तरीय बीउ उत्पादन, उत्पादन क्षमता कम भएको पुरानो बीउ विस्थापित र बीउ आलुमा आत्मनिर्भर बनाउन २ वर्षयता पूर्व बीउ आलु कार्यक्रम सञ्चालन गरिएको जानकारी दिनुभयो ।
जलजलाको धेरै भूगोलमा आलुखेती भए पनि वर्षौँदेखि एउटै बीउको प्रयोग हुँदा उत्पादन, गुणस्तर र रोगकीराको समस्या देखिएको थियो ।
गाउँपालिकाले किसानबाट खरिद गरेको आलुको बीउ ५० प्रतिशत अनुदानमा किसान र कृषि ज्ञान केन्द्रमार्फत सिफारिस भएका कृषक समूह तथा म्याग्दी, कास्कीलगायत जिल्लाका किसानलाई ३५ हजार ९ सय ७७ किलो बीउ बिक्री गरी २१ लाख ९८ हजार आम्दानी गरेको हो ।