अमेरिकाको भर्जिनियाबाट एकसातादेखि बेपत्ता नेपाली नर्स ममता काफ्लेको खोजी गर्दै प्रहरी
प्रकाशित मिति : श्रावण २४, २०८१ बिहीबार
मनासस पार्क पुलिस डिपार्टमेन्टले अमेरिकाको भर्जिनिया मनाससबाट एकसातादेखि बेपत्ता नेपाली ममता काफ्लेको खोजी गरिरहेको छ । उनी जुलाई ३१ मा अन्तिमपटक मनासस पार्कमा देखिएको र त्यसपछि परिवार वा साथीहरुको सम्पर्कमा नरहेको भन्दै प्रहरीले ममता काफ्ले खोजीमा सघाउन सर्वसाधारणहरुलाई आग्रह गरेको छ । उनीबारे कुनै जानकारी भएमा मनासस पार्क पुलिसको फोन नम्बर ७०३ ३६१ ११३६ मा सम्पर्क गर्न अनुरोध गरिएको छ ।
२८ बर्षीया ममता काफ्लेको ५ फिट उचाई, १३२ पाउण्ड तौल, कालो कपाल र गाढा खैरो आँखा भएको प्रहरीले व्याख्या गरेको छ । उनी लामो समयदेखि बेपत्ता भएकाले अनैच्छिक परिस्थितमा बेपत्ता भएको मानिएको छ । उनको परिवारले पनि ममता काफ्लेको खोजीका लागि सघाउन सार्वजनिक अपिल गरिरहेको छ । काभ्रेकी काफ्ले अमेरिकाको भर्जिनियामा रजिष्टर्ड नर्सका रुपमा कार्यरत रहेको उनको सामाजिक सञ्जाल प्रोफाइलमा उल्लेख रहेको छ ।
उनले अन्तिमपटक जुलाई २८ मा सामाजिक सञ्जालमा पोष्ट गरेको देखिएको छ । उनका श्रीमान नरेश भट्टले पनि सामाजिक सञ्जालमार्फत ममताको खोजीमा सघाउन अनुरोध गरेका छन् । अमेरिकामा नेपाली समुदायका तर्फबाट ममता सकुशल फेला पर्ने अपेक्षा र कामना गर्दै सामाजिक सञ्जालमा पोष्ट गरिएको छ ।