Follow @khasokhasmag

नेपालदेखि अमेरिकासम्म मानव तस्करीको जालो


प्रकाशित मिति : भाद्र २४, २०७३ शुक्रबार

अवैध रुपमा अमेरिका लैजाने तथा मानव ओसारपसार तथा बेचबिखन गर्ने गिरोहमा संलग्न दुई व्यक्तिलाई प्रहरीले पक्राउ गरेको छ । रुकुम, मग्मा गाविस घर भई हाल ललितपुर महालक्ष्मी स्थान बस्ने ३२ वर्षीय नवीन भनिने नवराज खत्री र बाग्लुङ, रिगा गाविस घर भई हाल लैनचौर बस्ने ३७ वर्षीय सागर शिरीषलाई प्रहरीको महानगरीय अपराध महाशाखाको टोलीले यही भदौ १७ गते पक्राउ गरी आज सार्वजनिक गरेको हो ।

उनीहरुले सङ्गठित रुपमा अन्तर्राष्ट्रियस्तरको सञ्जाल बनाएको अनुसन्धानका क्रममा खुल्न आएको महाशाखाका प्रमुख वरिष्ठ प्रहरी उपरीक्षक सर्वेन्द्र खनालले जानकारी दिए । अभियुक्तले नवलपरासी, रुपौलियाका प्रेमनारायण महतो लगायत व्यक्तिलाई त्रिभुवन अन्तर्राष्ट्रिय विमानस्थल हुँदै विभिन्न देश ट्रान्जिट बनाई अमेरिका पठाइदिने भनी प्रलोभनमा पारी प्रतिव्यक्ति २० लाख देखि ३० लाखसम्म रकम लिएको महाशाखाले जनाएको छ ।

काठमाडौँबाट भारत–थाइल्यान्ड–जापान–फ्रान्स–मेक्सिको हुँदै अमेरिका जान लागेका अवस्थामा पीडित महतो भदौ १७ गते त्रिभुवन अन्तर्राष्ट्रिय विमानस्थलबाट ४० हजार डलरसहित पक्राउ परेका थिए । उनी पक्राउ परेपछि अनुसन्धानका क्रममा खत्री र शिरीष गिरोहको खुलासा भएको हो । अनुसन्धानका क्रममा अमेरिकामा मानव तस्करी गर्न प्रयोग गरिने विभिन्न मार्गसमेत पत्ता लागेको खनालले जानकारी दिए ।

मानव तस्करीका लागि प्रयोग गरिएको पहिलो मार्गमा काठमाडौँ–भारत–फ्रान्स–मेक्सिको–अमेरिका, दोस्रो मार्गमा काठमाडौँ–भारत, जापान ट्रान्जिट हुँदै मेक्सिको–अमेरिका र तेस्रो मार्गमा काठमाडौँ–सिंगापुर–जापान–मेक्सिको–अमेरिका छ । ती देशमा रहेका एजेन्टले नेपालबाट पठाइएका उनीहरुलाई सम्पर्क गर्ने र अन्य देशमा जानका लागि आवश्यक व्यवस्था मिलाउने गरेका थिए । मेक्सिकोमा पुगेपछि सबै मानिस अलपत्र पारी मेक्सिको प्रहरीले पक्राउ गरी थुनामा राख्ने गरेको छ । थुनामा परेपछि त्यहाँको एजेन्टले भेटी उनीहरुलाई कानुन व्यवसायीसँग सम्पर्क गराइदिने गरेको खनालले जानकारी दिए ।

जेनिशा नामकी कानुन व्यवसायीले थुनामा परेका व्यक्तिबाट प्रतिव्यक्ति दश हजार डलर लिई कानुनी सहजताको काम गर्ने गरेको र कानुनी प्रक्रिया मिलाई मेक्सिको प्रहरीको थुनाबाट मुक्त गरी अमेरिकाको टेक्सासको शरणार्थी शिविरमा राख्ने व्यवस्था मिलाउने गरेको अनुसन्धानका क्रममा खुलेको कारोबारमा खबर छ । मानव तस्करीले गर्दा काठमाडौँमा अमेरिका जान इच्छुक व्यक्तिसँग सम्पर्क गरी यहाँका एजेन्टले प्रतिव्यक्ति दश लाख, मेक्सिको पुगेपछि कानुन व्यवसायीले दश लाख र टेक्सास शरणार्थी शिविरमा पुगेपछि दश लाख गरी तीन किस्तामा रकम लिने गरेको अनुसन्धानका क्रममा खुलेको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com