युद्धमा ३७ हजार बढिको ज्यान गएपछि इजरायलका युद्ध क्याबिनेट मन्त्री बेनीद्धारा राजिनामा
प्रकाशित मिति : जेष्ठ २७, २०८१ आईतबार
इजरायलको युद्ध क्याबिनेट मन्त्री बेनी गान्ट्जले देशको आपतकालीन सरकारबाट राजीनामा दिनुभएको छ ।
यो कदमलाई युद्धपछि गाजाका लागि प्रधानमन्त्री बिन्यामिन नेतन्याहुको योजनालाई लिएर दुईबीचको मतभेदको गहिराइको रूपमा हेरिएको छ ।
गान्ट्जले आइतवार तेल अवीभमा पत्रकार सम्मेलनमा आफ्नो राजीनामाको घोषणा गर्नुभयो । उहाँले यो निर्णय ‘भारी मनका साथ’ लिएको बताउनु भयो ।
आगामी चुनावमा नेतान्याहुको सम्भावित प्रतिद्वन्द्वी मानिने गान्ट्जले नेतान्याहुलाई देशमा चुनावको मिति तय गर्न आह्वान गर्नुभयो ।
राजीनामा दिएपछि नेतान्याहुले ट्वीटरमा लेख्नुभएको छ , ‘बेनी, यो अभियान छाड्ने समय होइन, सेनामा भर्ती हुने समय हो ।
इजरायली विपक्षी नेता यायर लिपिडले गान्ट्जलाई सोशल मिडियामा समर्थन गर्दै उहाँको निर्णयलाई “आवश्यक र सही“ भन्नुभएको छ ।
गान्ट्जको राजीनामाको लगत्तै, अति दक्षिणपन्थी राष्ट्रिय सुरक्षा मन्त्री इटामार बेन–गभिरले युद्ध मन्त्रिपरिषद्मा स्थानको माग गरेको बताइएको छ ।
बेन–गवीर दक्षिणपन्थी गठबन्धनको हिस्सा हुन् । गठबन्धनले अमेरिकी राष्ट्रपति जो बाइडेनको युद्धविराम प्रस्तावलाई इजरायलले स्वीकार गरेमा सरकार छोड्ने र सरकार ढाल्ने धम्की दिएको छ ।
इजरायल र प्यालेस्टिनीबिच ८ महिना भन्दा बढीको युद्धमा गाजा क्षेत्रको ३७ हजार ८४ को मृत्यु भएको हमासद्वारा सञ्चालित गाजाको स्वास्थ्य मन्त्रालयले जनाएको छ ।
अक्टोबर ७ मा युद्ध सुरु भएदेखि थप ८४ हजार ४९४ जना घाइते भएको मन्त्रालयले जनाएको छ ।