काभ्रेमा श्रीमान श्रीमतीको हत्या, घटनास्थलमा भेटियो पाँच किलोको हथौडा
प्रकाशित मिति : जेष्ठ ८, २०८१ मंगलबार
काभ्रेपलान्चोकमा श्रीमान श्रीमतीको हत्या भएको छ । महाभारत गाउँपालिका–४ मा श्रीमान् श्रीमतीको हत्या भएको अबस्थामा शव भेटिएको प्रहरीले बताएको छ ।
महाभारत गाउँपालिका–४ महादेवटारका ६० वर्षीय मानबहादुर बल र उहाँकी ५० वर्षीया श्रीमती केकाइमाया बल घरभित्रै मृत फेला पर्नुभएको हो ।
उहाँहरूको टाउकोमा हम्मरले हानेर हत्या गरेको अवस्थामा शव फेला परेको महाभारत गाउँपालिका–४ का वडाध्यक्ष विशाल मोक्तानले जानकारी दिनुभयो ।
उहाँका अनुसार घटनास्थलमा पाँच किलोको हथौडा भेटिएको छ । बल दम्पतीले गाउँमा पसल सञ्चालन गर्दै आउनु भएको थियो ।
बल दम्पतीका दुई छोरा र एक छोरी काठमाडौंमा बस्दै आएका थिए । घटनाको अनुसन्धान जारी रहेको काभ्रे प्रहरीले जनाएको छ ।