विश्व स्वास्थ्य संगठनको चेतावनी : युरोपमा प्रतिदिन १० हजारको मृत्यु हृदयघातबाट , महिला भन्दा पुरुष उच्च जोखिममा
प्रकाशित मिति : जेष्ठ २, २०८१ बुधबार
विश्व स्वास्थ्य संगठन डब्ल्युएचओ ले युरोपेलीहरूसँग नुनको सेवन कम गर्न आग्रह गरेको छ । युरोपमा ३० देखि ७९ वर्षबीचका तीन वयस्कमध्ये एकजना उच्च रक्तचापबाट पीडित छन् । रक्तचाप प्राय नुनको अधिक सेवनले हुन्छ ।
डब्ल्युएचओको युरोप शाखाका निर्देशक हान्स क्लुजले विज्ञप्तिमा भन्नुभएको छ , ‘नुनको सेवनलाई २५ प्रतिशतले कम गर्ने लक्षित नीतिहरू लागू गर्दा सन् २०३० सम्म हृदयघातबाट करिब ९ लाख मानिसको ज्यान बचाउन सकिन्छ ।’
डब्ल्युएचओको युरोपेली क्षेत्रका ५३ मध्ये ५१ मुलुकमा औसत दैनिक नुनको सेवन डब्ल्युएचओले सिफारिस गरेको अधिकतम पाँच ग्राम वा एक चम्चाभन्दा बढी हुन्छ । यसको मुख्य कारण प्रशोधित खाद्य पदार्थ र स्न्याक्स हो ।
‘नुनको उच्च सेवनले रक्तचाप बढाउँछ, रक्तचाप हृदयाघात वा स्ट्रोकजस्ता हृदय रोगहरूका लागि प्रमुख जोखिम कारक हो’, डब्ल्युएचओले भनेको छ ।
संगठनले युरोपमा रक्तचापको विस्तार विश्वमा सबैभन्दा बढी रहेको बताएको छ । संगठनको प्रतिवेदनअनुसार यस क्षेत्रमा महिलाको तुलनामा पुरुषको मृत्यु हुने सम्भावना करिब अढाई गुणा बढी छ ।
हृदयघातबाट मृत्यु हुनेमा भौगोलिक विभाजन पनि छ । पश्चिमी युरोपको तुलनामा पूर्वी युरोप तथा मध्य एसियामा हृदयघातबाट युवाको मृत्यु हुने सम्भावना करिब पाँच गुणा बढी छ ।
युरोपमा ४० प्रतिशत मृत्यु हृदयघातबाट हुने गरेको बताइन्छ । यो एक दिनमा १० हजार वा प्रतिवर्ष ४० लाख मृत्यु बराबर हो । एजेन्सीहरु