नेपालमा प्रेस स्वतन्त्रता हननका घटना बढे : पत्रकार महासंघ
प्रकाशित मिति : बैशाख १, २०८१ शनिबार
नेपाली पत्रकारिता क्षेत्रका लागि २०८० साल चुनौतीपूर्ण वर्ष रहेको नेपाल पत्रकार महासङ्घले बताएको छ । महासङ्घमा अभिलेख भएअनुसार २०८० सालमा प्रेस स्वतन्त्रता हननका ६४ वटा घटना भएका छन् । पत्रकारलाई समाचार प्रकाशन प्रसारण भएकै कारण धम्की तथा दुर्व्यवहार गर्ने, आक्रमण गर्ने, गिरफ्तारी गर्ने, सूचना सङ्कलनमा अवरोध गर्ने जस्ता घटना महासङ्घमा अभिलेख भएका छन् ।
२०७९ सालमा प्रेस स्वतन्त्रता हननका ५१ वटा घटना भएका थिए भने २०७८ मा प्रेस स्वतन्त्रता हननका ७४ घटना भएका थिए । महासचिब रोशन पुरीले जारी गर्नुभएको बिज्ञप्तिका अनुसार यसमा पक्राउका ३ घटना तथा कब्जा र अवरोधका ३ वटा घटना भएका छन् ।
यस अवधिमा १५ जनामाथि आक्रमण भएको छ भने ३० जनामाथि दुर्व्यवहार र धम्की दिइएको छ । महासङ्घको मिडिया मनिटरिङका अनुसार पेसागत असुरक्षाका १२ घटना हुँदा लैङ्गिक हिंसाका एक घटना भएका छन् ।
‘महासङ्घमा दर्ता भएका श्रम समस्याहरू बिस्तारै हल हुँदै गएपनि श्रमको दीर्घकालीन समस्या समाधानमा अबका वर्षमा मुख्य ध्यान दिनुपर्ने आवश्यकता छ ।
सञ्चार क्षेत्रमा देखिएको गम्भीर खालको आर्थिक सङ्कटसँग जुध्ने र प्रविधिलाई आत्मसात् गरेर अगाडि बढ्नुपर्ने चुनौती नयाँ वर्ष सँगसँगै भित्रिएको छ ’ बिज्ञप्तिमा भनिएको छ । २०८० सालमा श्रमजीवी पत्रकारले तलब नपाएर विभिन्न सञ्चार गृहमा आन्दोलन गर्नुपरेको थियो ।
विश्वव्यापी रूपमा देखिएको आर्थिक सङ्कट, प्रविधि र माध्यमको विकाससँगै समग्र पत्रकारिता क्षेत्रमा नयाँ नयाँ चुनौती देखिएका महासंघले बताएको हो ।