२२ बर्ष लुकेका गुरुङलाई अन्तत प्रहरीले भेट्टायो
प्रकाशित मिति : चैत्र ११, २०८० आईतबार
पश्चिम नवलपरासी प्रहरीले २२ वर्षपछि हत्या आरोपीलाई पक्राउ गरेको छ । बर्दघाट नगरपालिका–१६ का बुद्धिजंग रानालाई गोली प्रहार गरेर हत्या गर्ने स्थानीय ४२ वर्षीय केशव गुरुङलाई प्रहरीले पक्राउ गरेको हो ।
२०५८ साल कार्तिक १५ गते गाउँमा सांस्कृतिक कार्यक्रम हेर्न जाँदा मोटरसाइकलको हेलमेटको विषयमा सामान्य विवाद हुँदा गुरुङले रानालाई गोली प्रहार गरेका थिए ।
गोली प्रहार गरेर फरार भएका गुरुङलाई जिल्ला अदालत नवलपरासीले २०६६ साल असार २८ गते सर्वस्वसहित जन्मकैदको फैसला गरेको थियो । पक्राउ परेका गुरुङलाई प्रहरीले फैसला कार्यन्वयन गर्नका लागि जिल्ला अदालतमा पेस गरेर कारागार चलान गरेको छ ।
गोली हानेपछि गुरुङ भारतमा गएर लुकिछिपी बस्दै आएका थिए । गुरुङ नेपाल आउने जाने गरेको सूचना प्रहरीले निगरानी बढाएको थियो । पछिल्लो पटक घर आएको मौकामा गुरुङलाई बर्दघाटबाट पक्राउ गरिएको जिल्ला प्रहरी कार्यालय नवलपरासीका प्रहरी नायव उपरिक्षक रेशम बोहोराले बताउनुभयो ।