बाँसबारी जग्गा प्रकरणमा विनोद चौधरीसंग सिआइबीले बयान लियो , बयानपछि चौधरीको प्रतिकृया कस्तो आयो त ?
प्रकाशित मिति : चैत्र ८, २०८० बिहीबार
बाँसबारी छाला जुत्ता कारखानाको जग्गा हिनामिना प्रकरणमा उद्यमी तथा नेपाली कांग्रेसका सांसद विनोद चौधरीसँग केन्द्रीय अनुसन्धान ब्यूरो सिआइबीले बयान लिएको छ । सरकारी जग्गा हिनामिना गरेको आशङ्कामा सिआइबीले चौधरीमाथि अनुसन्धान थालेको संसद् सचिवालयमार्फत सभामुख देवराज घिमिरेलाई जानकारी गराएसँगै बिहिबार बयान लिएको हो ।
जिल्ला सरकारी वकील कार्यालयमा चौधरीसँग बयान लिइएको सिआइबीका प्रमुख श्यामलाल ज्ञवालीले जानकारी दिनुभयो । प्रहरी अतिरिक्त महानिरीक्षक ज्ञवालीले उहाँ भाग्ने र प्रमाण नष्ट गर्ने अवस्था नरहेकाले उहाँलाई पक्राउ नगरी सिधै बयान लिइएको जानकारी दिनुभयो ।
सरकारी वकिल कार्यालयमा उपस्थित भइ बयान दिइसकेपछि सञ्चारकर्मीहरूसँग कुरा गर्दै सांसद चौधरीले आफ्नो चरित्रको सर्टिफिकेट स्टन्ट गर्नेहरूलाई बुझाउन आवश्यक नरहेको बताउनु भयो । उहाँले भन्नुभयो ः ४५ वर्षको आफ्नो यात्रापछि मेरो आफ्नो चरित्रको सर्टिफिकेट कसैलाई बुझाउनु पर्दैन, त्यो पनि खासगरीकन स्टन्ट गर्नेहरूलाई ।
उहाँले सरकारले उद्यम र उद्यमी तथा करदातामाथि राजनीतिकरण गरेको आरोप लगाउनु भएको भयो । चौधरीले ४२ वर्षअघिको बाँसबारीको कौडीको भाउमा पनि नबिक्ने जग्गालाई आधार बनाइ पब्लिक—प्राइभेट पार्टनरसिपको एउटा उत्कृष्ट मोडलको रुपमा खडा गरिएको एउटा नविनतम सोचलाई राजनीतिकरण गर्नु दुःखद् रहेको बताउनु भयो । १० रोपनी जग्गाको बारेमा कुनैपनि प्रकारको कुदृष्टि राख्छ भनेर सोच्नु नै एउटा विकृत मानसिकताको उपज हो उहाँले भन्नुभयो ।