आप्रवासी कामदारलाई रोक लगाउने मलेसियाको निर्णय , नेपालीहरु प्रभावित हुने
प्रकाशित मिति : फाल्गुन २७, २०८० आईतबार
मलेसियाले औपचारिक क्षेत्रमा काम गर्न आउने आप्रवासी श्रमिकका लागि आगामी जेठ १८ अर्थात मे ३१ देखि प्रवेशमा रोक लगाउने भएको छ । मलेसिया नेपाली श्रमिकको प्रमुख गन्तव्य मुलुक हो । गत वर्ष २ लाख १९ हजार नेपाली रोजगारीका लागि मलेसिया पुगेका थिए ।
२०७५ मा शून्य लागतसहितको श्रम सम्झौता भएपछि मलेसियाले नेपाललाई प्राथमिकतामा राख्दै आएको छ । मलेसियामा झन्डै ५ लाख नेपाली श्रमिक छन् । उनीहरुले सुरक्षा गार्ड, पर्यटन क्षेत्र, फर्निचर, सरसफाइ र साना औद्योगिक उत्पादन लगायतमा कार्यरत रहेका छन । मागभन्दा आपूर्ति बढी भएको र त्यसले आन्तरिक सुरक्षामा समस्या सिर्जना गरेको भन्दै मलेसियाले अर्को आदेश नहुँदासम्मका लागि भन्दै आप्रवासी श्रमिकलाई भर्ना नलिने निर्णय गरेको बताएको हो ।
काठमाडौंस्थित मलेसियाली दूतावासले अनलाइन भिसाको आवेदन लिन अनुमति पाएका भिसा सेन्टरहरूलाई यसबारे औपचारिकजानकारी गराइसकेको छ ।
मलेसियाको गृह मन्त्रालयले आवश्यक पर्ने आप्रवासी श्रमिकलाई मे ३१ अघि नै ल्याइसक्न रोजगारदाता कम्पनीलाई समयसीमा तोकिदिएको छ । रोजगारदाता कम्पनीले आप्रवासी श्रमिक ल्याउन अनुमति पाएको कोटा प्रयोग नगर्ने भए सो मितिभित्र रद्द गरिसक्नुपर्ने पनि उल्लेख गरिएको छ ।
मलेसियाको गृह मन्त्रालयले मे १७ भित्रै आप्रवासी श्रमिकको भिसा लगाइसक्नुपर्ने जनाएको छ । ‘मे ३१ पछि आप्रवासी श्रमिकले मलेसियामा प्रवेश पाउने छैनन्,’ मलेसियाको सहर पुत्राजयमा आयोजित पत्रकार सम्मेलनमा मलेसियन गृहमन्त्री सेरी सैफुद्दीन नासुसन इस्माइलले भन्नुभएको छ । मलेसियाले आफूसँग भएको कुल श्रमशक्तिको १५ प्रतिशत मात्रै विदेशी श्रमिक राख्ने नीति लिएको छ । मलेसियामा १ करोड ७० लाख श्रमशक्ति रहेको त्यहाँको सरकारले निकालेको तथ्याङकले देखाएको छ ।
रोजगारदाताले ओभरटाइम दिन नसक्दा श्रमिकहरू न्यूनतम तलब १५ सय रिंगेटमा काम गर्न बाध्य छन् । पछिल्लो समय मलेसियामा आर्थिक मन्दीले उत्पादन र सेवा क्षेत्रमा असर पुगेपछि रोजगारदाताले काम दिन सकिरहेका छैनन ।