राष्ट्रिय सभाका अध्यक्षसहित २० जनाको पदावधि सकिदै, अध्यक्षका लागि कांग्रेस र माओवादी बिचको किचलो साम्य हुन सकेन
प्रकाशित मिति : फाल्गुन १९, २०८० शनिबार
राष्ट्रिय सभाका २० जना सदस्यहरुको पदावधि आइतबार सकिदैछ । पदावधि सकिनेमा अध्यक्ष गणेशप्रसाद तिमिल्सिनासहित २० जना सदस्यहरु रहनु भएको छ । राष्ट्रिय सभा सदस्यको पदावधि छ वर्षको हुने र हरेक दुई वर्षमा एक तिहाइ सदस्यको निर्वाचन हुने संबैधाननिक व्यवस्था रहेको छ ।
नयाँ संविधानबमोजिम राष्ट्रियसभा गठन भएपछि पहिलोपटक कार्यकाल निर्धारण गर्न गोला प्रथा भएकोमा त्यसबेला छ वर्षे कार्यकाल निर्धारण भएका सांसदको पदावधि आजदेखि सकिएको हो ।
नेपाली कांग्रेसको तर्फबाट राष्ट्रिय सभा संसदीय दलका नेता रमेशजंग रायमाझी, अनिता देवकोटा, प्रकाश पन्थ र जितेन्द्रनारायण देवको पदावधि सकिँदै छ । माओवादी केन्द्रबाट विना पोखरेल, महेशकुमार महरा, हरिराम चौधरी तथा एकीकृत समाजवादीका तर्फबाट नन्दा चपाईं, सिंगबहादुर विश्वकर्मा र जसपाकी प्रमिलाकुमारी यादव को पदावधि सकिदै छ । स्वतन्त्र सांसद खिमलाल देवकोटाको पनि यही समयमा पदावधि सकिँदै छ ।
पदावधि सकिनेमा एमालेबाट निर्वाचित राष्ट्रिय सभा अध्यक्ष गणेशप्रसाद तिमिल्सिना, प्रमुख सचेतक भैरव सुन्दर श्रेष्ठ, इन्दु कडरिया, कुमार दसौँदी, दीपा गुरुङ, दिलकुमारी रावल थापा पार्वती , नरपति लुवार र रामचन्द्र राई रहनुभएको छ । मन्त्रिपरिषद्को सिफारिसमा राष्ट्रपतिबाट मनोनीत विमला राई पौड्यालको आजैदेखि पदावधि सकिँदै छ ।
आजदेखि रिक्त हुने २० मध्ये १९ पदमा निर्वाचन भइसकेको छ । निर्वाचित सांसदहरूले सोमबार शपथग्रहण गर्ने कार्यक्रम रहेको छ । बाँकी रहेको एक पदमा भने मन्त्रिपरिषद्को सिफारिसबमोजिम राष्ट्रपति रामचन्द्र पौडेलले मनोनयन गर्नुहुनेछ ।
कोशी प्रदेशमा गठबन्धनको तर्फबाट उम्मेदवार बन्नु भएकी माओवादी उम्मेदवार पराजित भएपछि सत्तारुढ माओवादी केन्द्र र नेपाली कांग्रेस बिचमा असमझदारी बढि रहेको छ । यसले राष्ट्रिय सभा अध्यक्ष पदमा किचलो बढाउने संभावना बढेर गएको छ । कांग्रेसले कृष्णप्रसाद सिटौलालाई अध्यक्ष बनाउने सहमति भएको भन्दै स्मरण गराइरहेको छ भने माओवादी केन्द्रले कोशी घटनापछि घटनाक्रमहरु फरक ढंगबाट बिकसित भइसकेको बताइरहेको छ ।