अमेरिकामा पत्नीको हत्या अभियोगमा पक्राउ रिमाल जेलमा, बिहिबार भिडियोमार्फत अदालतमा पेश गरिने
प्रकाशित मिति : फाल्गुन १६, २०८० बुधबार
अमेरिकाको ओहायोमा श्रीमति चन्द्रमाया पौडेल रिमालको हत्या अभियोगमा पक्राउ परेका नेपाली भाषी जेम्स रिमाललाई हिराशतमा लिइएको र अहिले समिट काउन्टी जेलमा स्थानान्तरण गरिसकिएको क्युयाहोगा फल्स प्रहरी विभागले खसोखासलाई जानकारी दिएको छ । क्युयाहोगा फल्स निवासी बेपत्ता महिला चन्द्रमाया पौडेल रिमालको शव मंगलबार बिहान जंगलमा फेला परेपछि प्रहरीले उनका पति जेम्स रिमालविरुद्ध हत्याको अभियोग लगाएको हो ।
जेम्स रिमाललाई फेब्रअरी २९ बिहिबार अदालतमा पेश गरिने जनाइएको छ । उनलाई स्टो म्युनिसिपल अदालतमा भिडियोमार्फत पेश गरिने तय भएको प्रहरीले जनाएको छ । प्रहरीले भनेको छ – ‘जेम्स रिमाल अहिले हिरासतमा छन्। उनलाई समिट काउन्टी जेलमा सारिएको छ । रिमाललाई भोलि स्टो म्युनिसिपल अदालतमा भिडिओमार्फत पेश गरिने छ ।’
प्रहरीले चन्द्रमायाको शव फेला पारेपछि जेम्स रिमाललाई पक्राउ गर्न वारेन्ट जारी गरेको थियो । रिमालविरुद्ध हत्या, घाँटी थिचेको, प्रमाणसँग छेडछाड गरेको, घरेलु हिंसा गरेको, प्रहरीलाई झुठो विवरण दिएको र शवको दुरुपयोग गरेको लगायत ६ वटा गम्भिर अभियोगहरु लगाइएको छ ।
आमाको मृत्यु र बाबु हिराशतमा परेपछि बालबालिकाहरुलाई समिट काउन्टी चिल्ड्रेन सर्भिसले जिम्मा लिएको र तीनजना बच्चाहरूलाई परिवारसँग राखेको प्रहरीले जनाएको छ । तर कस्को परिवारसँग राखिएको भन्नेबारे केही बताइएको छैन । उनीहरुका एक छोरा र दुई छोरी रहेका छन् । कान्छी छोरी सन् २०२२ मा जन्मिएको र अहिले झण्डै १५ महिनाकी रहेको जनाइएको छ ।
रिमाल दम्पत्ति दुबैजना नेपालीभाषी भुटानी भएको र शरणार्थीका रुपमा अमेरिका आएको जनाइएको छ । उनीहरुले अमेरिका आइसकेपछि विवाह गरेका थिए । छिमेकीहरुका अनुशार उनीहरू आफ्ना तीन छोराछोरीका साथमा पाँच वर्षभन्दा कम समयदेखि क्युयाहोगा फल्स स्थीत आफ्नो घरमा बस्दै आएका थिए ।
३३ वर्षीया चन्द्रमाया पौडेल–रिमालको शव मंगलबार बिहान ११ बजेतिर मिडलबरी रोडको समिट मेट्रो पार्क फ्रिडम ट्रेल नजिकैको जंगलमा फेला परेको प्रहरीले पुष्टि गरेको हो । समिट काउन्टी मेडिकल परीक्षक अधिकारीले तुरुन्तै मृत्युलाई शङ्कास्पद भनेर उल्लेख गरेका थिए ।
उनी गत बुधबार बिहान बेपत्ता भएको रिपोर्ट गरिएको थियो । उनका पति ३३ बर्षीय जेम्स रिमालले फेब्रुअरी २१ मा चन्द्रमाया आफ्नो कुयाहोगा फल्सको घरबाट बेपत्ता भएको अधिकारीलाई बताएका थिए । आफू बिहान ९ बजे उठ्दा पत्नी चन्द्रमाया हराएको उनले अधिकारीहरुलाई बताएपछि उनको खोजी सुरु गरिएको थियो । प्रहरीले उनीहरुको घर र वरपरको क्षेत्रमा खोजी गरी छिमेकीसँग सोधपुछ गरेको थियो ।
फोटो : क्युयाहोगा फल्स प्रहरी विभाग
