अमेरिकाको भिजिटर भिसामा नेपालीको रेकर्ड ब्रेक, गतमहिना चालु आर्थिक बर्षकै सबैभन्दा धेरैलाई
प्रकाशित मिति : फाल्गुन १६, २०८० बुधबार
अमेरिकाको भिजिटर भिसा पाउने नेपालीहरुको संख्यामा गत महिना अर्थात् जनवरीमा रेकर्ड ब्रेक भएको छ । चालु आर्थिक बर्ष २०२४ को ४ महिनामा नै सबैभन्दा धेरै जनवरीमा नेपालीहरुले अमेरिकाको भिजिटर भिसा पाएको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । अमेरिकामा अक्टोबरदेखि आर्थिक बर्षको सुरुवात हुन्छ ।
गत महिना अर्थात जनवरी २०२४ मा २३६७ जना नेपालीहरुले अमेरिकाको बी श्रेणीको भिजिटर भिसा पाएका छन् । काठमाडौंमा रहेको अमेरिकी दूतावासलेमात्र १९५७ जनालाई अमेरिकाको भिजिटर भिसा स्वीकृत गरेको थियो । यस अगाडि डिसेम्बरमा १९०७ जना नेपालीहरुले अमेरिकाको भिजिटर भिसा पाएका थिए । काठमाडौंमा रहेको अमेरिकी दूतावासलेमात्र डिसेम्बरमा १६१३ जनालाई अमेरिकाको भिजिटर भिसा स्वीकृत गरेको थियो ।
त्यस्तै नोभेम्बरमा १७८१ जना नेपालीहरुले अमेरिकाको बी श्रेणीको भिजिटर भिसा पाएका थिए । काठमाडौंमा रहेको अमेरिकी दूतावासलेमात्र नोभेम्बरमा १४१९ जनालाई अमेरिकाको भिजिटर भिसा स्वीकृत गरेको थियो । आर्थिक बर्ष २०२४ को पहिलो महिना अर्थात् सन् २०२३ को अक्टोबरमा २०८१ जना नेपालीहरुले अमेरिकाको भिजिटर भिसा पाएका थिए । काठमाडौंमा रहेको अमेरिकी दूतावासलेमात्र अक्टोबरमा १६७५ जनालाई अमेरिकाको भिजिटर भिसा स्वीकृत गरेको थियो ।
२०२३ मा आवेदकमध्ये ६९ प्रतिशत नेपालीलाई अमेरिकाको भिजिटर भिसा
आर्थिक बर्ष २०२३ मा कुल नेपाली आवेदकहरुमध्ये झण्डै ६९ प्रतिशतले अमेरिकाको भिजिटर भिसा पाएका छन् । अमेरिकी विदेश मन्त्रालय, ब्यूरो अफ कन्सुलर अफेयर्सको तथ्यांक अनुशार भिजिटर भिसाका नेपाली आवेदकमध्ये जम्मा ३१ दशमलव ३ प्रतिशतकोमात्र भिसा अस्वीकृत गरिएको छ । यद्यपी भिसा स्वीकृत दर अघिल्लो आर्थिक बर्षको तुलनामा भने कम हो ।
आर्थिक बर्ष २०२३ मा १८ हजार २ सय ४५ जना नेपालीहरुले अमेरिकाको भिजिटर भिसा पाएका थिए । यो बर्ष झण्डै २६ हजार ५ सय नेपालीले भिजिटर भिसाका लागि आवेदन दिएकोमा झण्डै ८ हजार ३ सय जनाको भिसा आवेदन अस्वीकृत भयो ।
आर्थिक बर्ष २०२२ मा अमेरिकाले कुल नेपाली आवेदकहरुमध्ये झण्डै ८० प्रतिशतलाई भिजिटर भिसा दिएको थियो । झण्डै २२ हजार ७ सय २९ जना नेपालीहरुले भिजिटर भिसाका लागि आवेदन दिएकोमा १८ हजार २ सय १४ जनालाई भिजिटर भिसा स्वीकृत गरिएको थियो ।
आवेदकमध्ये झण्डै ४५ सय १५ जना नेपालीहरुले भने भिसा पाएनन् । कुल भिजिटर भिसा आवेदक संख्याको १९ दशमलव ८५ प्रतिशतलेमात्र भिसा नपाएका हुन् । अमेरिकाले आर्थिक बर्ष २०२१ मा पनि झण्डै ८१ प्रतिशत नेपाली आवेदकहरुलाई अमेरिकाको भिजिटर भिसा प्रदान गरेको थियो । विगत ३ बर्षदेखि अमेरिकाको भिजिटर भिसाका लागि आवेदन दिने नेपालीहरुमध्ये झण्डै ७० प्रतिशतभन्दा बढीले भिसा पाएका छन् ।
अमेरिकाले २०२१ मा ७१२८ नेपालीलाई अमेरिकाको भिजिटर भिसा प्रदान गरेको र जम्मा १८ दशमलव ७२ प्रतिशतको मात्र भिजिटर भिसा अस्वीकृत गरेको थियो । भिजिटर भिसाका कुल ८ हजार ७ सय ७३ नेपाली आवेदकहरुमध्ये १६४५ जनालेमात्र अमेरिकाको भिसा पाएनन् ।
२०२१ मा कोरोना महामारीका कारण विना अन्तरवार्ता भिसा नविकरणको आवेदन दिनेहरु उल्लेख्य थिए । २०२१ मा नेपालीहरुलाई अमेरिकाको भिसा दिने दर ऐतिहासिक रुपमा उच्च बनेको थियो ।
त्यस अगाडि आर्थिक बर्ष २०२० मा आवेदकमध्ये झण्डै ५१ दशमलव ९ प्रतिशत नेपालीहरुलाई अमेरिकाले भिजिटर भिसा प्रदान गरेको थियो । यद्यपी सन् २०२० मा अमेरिकाको भिजिटर भिसा स्वीकृत हुने नेपालीहरुको प्रतिशत दर त्यस अगाडिका ३ बर्षको तुलनामा सबैभन्दा उच्च थियो ।
आर्थिक बर्ष २०२० को तुलनामा २०२१ मा भिसा स्वीकृतिको प्रतिशत दर बढेपनि संख्या भने घटेको थियो । २०२० मा ७ हजार ७ सय ५१ नेपालीहरुलाई अमेरिकाको भिजिटिर भिसा प्राप्त गरेकोमा २०२१ मा यो संख्या अझ घटेको थियो ।
आर्थिक बर्ष २०२० मा झण्डै १५ हजार नेपालीहरुले अमेरिकाको भिजिटर भिसा आवेदन दिएका थिए । त्यसमध्ये ७ हजार ७ सय ५१ जनाको भिजिटर भिसा स्वीकृत भएको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ ।
नेपालीको भिजिटर भिसा अस्वीकृत दर आर्थिक बर्ष सन् २०१९ मा ५० दशमलव ७ प्रतिशत र २०१८ मा ५१ दशमलव ५ प्रतिशत रहेको थियो । आर्थिक बर्ष २०१७ मा भने अस्वीकृत दर ४६ दशमलव ४ प्रतिशतमात्र थियो ।
आर्थिक बर्ष २०१८ मा भने नेपालीहरुको भिजिटर भिसा अस्वीकृत दर सन् २०१२ पछिकै सबैभन्दा धेरै रहेको थियो । सन् २०११ मा भने त्योभन्दा पनि धेरै कुल आवेदकमध्ये ५९ दशमलव ९ प्रतिशत नेपालीहरुको भिजिटर भिसा अस्वीकृत भएको थियो । सन् २००६ देखि सन् २०११ सम्म भिजिटर भिसाका कुल आवेदकमा भिसा पाउनेहरुभन्दा नपाउनेहरुकै प्रतिशतदर उच्च थियो ।
तर सन् २०१२ देखि २०१७ सम्म भिजिटर भिसाका कुल आवेदकमा भिसा पाउनेहरुको प्रतिशत नपाउनेहरुको तुलनामा बढी थियो । सन् २०१४ मा त कुल भिजिटर भिसाका नेपाली आवेदकहरुमध्ये ६१ दशमलव ८ प्रतिशतले भिसा पाएका थिए । कुल आवेदकमध्ये जम्मा ३८ दशमलव २ प्रतिशत नेपाली आवेदकको भिजिटर भिसा अस्वीकृत भएको थियो ।