अब भिजिट भिसामा नेपालबाट बाहिर जानेहरुका लागि लचिलो नीति, पूरानो कडा नीति खारेज
प्रकाशित मिति : माघ ९, २०८० मंगलबार
नेपाल सरकारको अध्यागमन विभागले पर्यटक भिसामा नेपालबाट बाहिर जानेहरुका लागि लचिलो नीति अपनाउने भएको छ । योसँगै पूरानो कडा नीति खारेज गरिएको छ । माघ ८ को उपप्रधानमन्त्री तथा गृहमन्त्री स्तरको नेपाल सरकारको निर्णय अनुशार नयाँ लचिलो नीति अपनाइएको अध्यागमन विभागले जनाएको छ ।
पर्यटक भिसामा नेपालबाट विदेश प्रस्थान गर्ने यात्रुहरुलाई प्रस्थान अनुमति दिंदा यात्रा सहजिकरणका लागि २०७८ साल फागुन २६ को सचिवस्तरको निर्णय खारेज गरी माघ १० बुधबारदेखि लागु हुनेगरी विभिन्न ६ बुँदालाई आधार मानेर पर्यटक भिसामा विदेश जाने नेपालीहरुलाई प्रस्थान अनुमति दिइने भएको छ ।
के थियो २०७८ साल फागुन २६ को सचिवस्तरको निर्णय? पढ्नका लागि यहाँ क्लीक गर्नुहोला ।
कम्तीमा ६ महिनाको म्याद भएको पासपोर्ट, अनअराइभल भिसा पाइने मुलुक बाहेक अन्य मुलुकमा जानेहरुका लागि जान चाहेको मुलुकको भिसा, दुईतर्फी हवाई टिकट, भ्रमण अवधिभर होटल बुक गरेको प्रमाण तथा आफन्तसँग रहने भएमा एकाघरका तीन पुस्ता भित्रको नाता खुल्ने नागरिकता प्रमाणपत्र वा अन्य कुनै प्रमाणपत्रका आधारमा प्रस्थानअनुमति दिइने भएको छ ।
त्यस्तै भ्रमणको सम्पूर्ण खर्च बेहोर्ने सरकारी तथा गैर सरकारी संस्थाको निमन्त्रणापत्र वा सो नभएमा कम्तीमा ५ सय अमेरिकी डलर बराबरको नगद सटही भएको प्रमाण आवश्यक पर्नेछ । नगद, डेबीट वा क्रेडिट कार्डबाट समेत सो प्रमाणित गर्न सकिनेछ । त्यस्तै संयुक्त अरब इमिरेट्स, बहराइन, कुवेत, कतार, ओमन र साउदी अरेबियामा भिजिट भिसामा भ्रमण गर्दा स्वघोषणा गर्नुपर्नेछ । स्वघोषणामा संलग्न विवरणको प्रमाणको भार सम्बन्धित व्यक्तिमा रहनेछ ।
भिजिट भिसामा विदेश प्रस्थान गर्नेहरुलाई अध्यागमन कार्यविधि २०६५ मा भएको व्यवस्थाको अलावा यी ६ बुंदालाई आधार मानेर प्रस्थान अनुमति प्रदान गर्न अध्यागमन विभागले त्रिभुवन अन्तर्राष्ट्रिय विमानस्थलको अध्यागमन कार्यालयलाई पत्राचार गरेको छ । भिजिट भिसामा विदेश जाने नेपाली यात्रुहरुले अपनाउनुपर्ने यात्रा सुझाव जारी भएकोमा सो यात्रा सुझाव जनचेतनाका लागिमात्र भएकाले प्रस्थान अनुमति दिंदा यात्रा सुझावका कुनै पनि बुंदालाई आधार नमान्न पत्राचार गरिएको छ ।
ट्राभल एड्भाइजरीमा के छ ? तल पढ्न गाह्रो भएमा यहाँ क्लीक गर्नुहोला ।
