थोरै घट्यो ग्रिनकार्डवाहकले नेपालबाट दम्पत्ति र २१ बर्ष मुनीका छोराछोरी ल्याउन लाग्ने अवधि
प्रकाशित मिति : पुस २९, २०८० आईतबार
अमेरिकी सरकारको विदेश मन्त्रालय ब्यूरो अफ कन्सुरल अफेयर्सले जारी गरेको फेब्रुअरीको भिसा बुलेटिन अनुशार ग्रिनकार्डवाहकले नेपालबाट दम्पत्ति र २१ बर्ष मुनीका छोराछोरी ल्याउन लाग्ने अवधि थोरै घटेको छ । अर्थात् उनीहरुका अनुहारमा थोरै मुस्कान ल्याएको छ ।
परिवारमा आधारित ग्रिनकार्डमा जनवरीको तुलनामा भिसा अप्वाइन्टमेन्ट पाउने मितिमा फेब्रुअरीमा थोरै फेरबदल भएको छ । जसले गर्दा विदेशमा हुने दम्पत्ति र २१ बर्ष मुनीका छोराछोरीहरुले छिटो ग्रिनकार्ड वा आप्रवासी भिसा पाउन सक्नेछन् ।
जनवरीमा ग्रिनकार्डवाहकका दम्पत्ति र २१ बर्ष नपुगेका छोराछोरीहरुका लागि अमेरिकाबाहिर हुनेहरुका सन्दर्भमा ८ फेब्रुअरी २०२० भन्दा अगाडि प्राथमिकता मिति हुनेहरुले दूतावासमा भिसाका लागि अन्तरवार्ताको अप्वाइन्टमेन्ट पाउन सक्नेछन् । यो जनवरीको तुलनामा झण्डै ३ महिना छिटो हो । जनवरीमा १ नोभेम्बर २०१९ भन्दा अगाडि प्राथमिकता मिति हुनेहरुको मात्र दूतावासमा भिसाका लागि अन्तरवार्ताको अप्वाइन्टमेन्ट तय गरिएको थियो ।
यद्यपी डिसेम्बरको तुलनामा भने फेब्रुअरीमा ग्रिनकार्डवाहकका दम्पत्ति र २१ बर्ष नपुगेका छोराछोरीहरुले भिसा अप्वाइन्ट पाउन लाग्ने अवधिमा झण्डै १ बर्ष कम भएको छ । तर अमेरिकी नागरिकका २१ बर्ष नाघेका अविवाहित छोराछोरी, ग्रिनकार्डवाहकका २१ बर्ष नाघेका अविवाहित छोराछोरी, अमेरिकी नागरिकका विवाहित छोराछोरीहरु र अमेरिकी नागरिकका दाजुभाई दिदीबहिनीहरुका लागि आप्रवासी भिसा वा ग्रिनकार्डका लागि दूतावासमा अप्वाइन्टमेन्ट पाउन लाग्ने अवधिमा भने फेब्रुअरीमा फेरबदल भएको छैन ।
अमेरिकी नागरिकका २१ बर्ष नाघेका अविवाहित छोराछोरीका सन्दर्भमा १ जनवरी २०१५ भन्दा अगाडि प्राथमिकता मिति भएकाहरु, ग्रिनकार्डवाहकका २१ बर्ष नाघेका अविवाहित छोराछोरीका सन्दर्भमा १ अक्टोबर २०१५ भन्दा अगाडि प्राथमिकता मिति भएकाहरु, अमेरिकी नागरिकका विवाहित छोराछोरीहरुका सन्दर्भमा २२ अप्रिल २००९ भन्दा अगाडि प्राथमिकता मिति भएकाहरु र अमेरिकी नागरिकका दाजुभाई दिदीबहिनीहरुका सन्दर्भमा २२ मे २००७ भन्दा अगाडि प्राथमिकता मिति भएकाहरुलेमात्र फेब्रुअरीमा आप्रवासी भिसा वा ग्रिनकार्डका लागि दूतावासमा अप्वाइन्टमेन्ट पाउन सक्नेछन् ।