अमेरिकाको अध्यागमन अदालतमा ३० लाख एसाइलमका मुद्दा पेन्डिङ, नेपालीका मात्रै ७४६१
प्रकाशित मिति : पुस १३, २०८० शुक्रबार
अमेरिकाको इतिहासमा नै अध्यागमनका अदालतमा एसाइमका मुद्दाहरूको ब्याकलग सबैभन्दा उच्च बिन्दुमा पुगेको छ । कायम भएको नयाँ कीर्तिमान अनुशार अध्यागमन अदालतमा विचाराधीन मुद्दाहरूको संख्या ३० लाख पार भएको छ ।
एक्जुकेटिभ अफिस फर इमिग्रेशन रिभ्युको तथ्यांक अनुशार नेपालीहरुका विचाराधिन एसाइलमका मुद्दाहरुको संख्यामात्र ७ हजार ४ सय ६१ रहेको छ । नेपालीका विचाराधिन मुद्दाहरु न्युयोर्कमा २६७९, सान एन्टोनियोमा १७५४, सान फ्रान्सिस्कोमा १४३३ र डलासमा २९४ रहेका छन् ।
१२ महिनाअघि नोभेम्बर २०२२ मा ब्याकलग २० लाख थियो। यसको मतलब विगत १२ महिनाको अवधिमा १० लाख विचाराधिन मुद्दाहरु बढेका छन् । गतबर्षको अप्रिलसम्म दक्षिणपश्चिमी सीमामा प्रवेश गरेका हजारौं आप्रवासीहरूका कारण यो ब्याकलक चर्को भएको हो । बाइडेन प्रशासनले टाइटल ४२ लाई हटाउनु अघि उनीहरुले शरण खोजेका थिए।
अत्याधिक मुद्दाका कारण अध्यागमन न्यायाधीशहरू दलदलमा छन्। अध्यागमन न्यायाधीशहरूसँग अब औसतमा हरेकसँग ४५ सय विचाराधीन मुद्दाहरू छन्। यदि विचाराधीन अध्यागमन मुद्दा भएका प्रत्येक व्यक्तिलाई एकै ठाउँमा भेला गरियो भने यो अमेरिकाको तेस्रो ठूलो सहर शिकागोको जनसंख्या भन्दा ठूलो हुनेछ। वास्तवमा अदालतको ब्याकलगमा पर्खिरहेका आप्रवासीहरूको संख्या अहिले कैयन राज्यहरूको जनसंख्या भन्दा ठूलो छ।
अध्यागमन अदालतको ब्याकलग जस्ता जटिल समस्यालाई सम्बोधन गर्ने प्रयास गरेका अघिल्लो प्रशासनहरू असफल हुदै आएका छन् । अब समस्या अझ डरलाग्दो चुनौतीमा परिणत भएको छ । अहिले अमेरिकाभर ६८२ जना अमेरिकी अध्यागमन न्यायाधीशहरू रहेका छन् । सन् २०१६ मा यो संख्या २१८ थियो । प्रत्येक न्यायाधीशले आर्थिक वर्ष २०२२ मा औसत करिब ९७५ मुद्दाहरू बन्द गरेका थिए । तर यो ब्याकलग कम गर्न पर्याप्त छैन ।