नेपालको संविधान दिवसको अवशरमा अमेरिकी विदेशमन्त्रीको शुभकामना
प्रकाशित मिति : आश्विन २, २०८० मंगलबार
अमेरिकी विदेशमन्त्री एन्टोनी ब्लींकेनले नेपालको संविधान दिवसको शुभकामना दिएका छन् । ब्लींकेनले भनेका छन् -‘अमेरिकाको तर्फबाट म सेप्टेम्बर २० मा नेपालको संविधान दिवसको अवसरमा नेपाली जनतालाई हार्दिक बधाई दिन चाहन्छु। यो नेपालका उपलब्धिहरू र हाम्रा राष्ट्रहरूबीचको स्थायी मित्रतालाई मान्यता दिने क्षण हो।’
जनता जनतामाझको बलियो सम्बन्धहरू अमेरिका र नेपालबीचको सम्बन्धको आधारशिला भएको उनले बताएका छन् । यो सम्बन्धले समझदारी, विश्वास र सद्भावनालाई बढावा दिने उनको भनाई छ ।
ब्लींकेनले भनेका छन् – ‘हामी यो विशेष दिन मनाउने क्रममा दुई राष्ट्रहरू बीच शान्ति, सहयोग र पारस्परिक समृद्धिलाई बढावा दिने यी अमूल्य सम्पर्कहरुप्रति हाम्रो प्रतिबद्धता नवीकरण गर्न खोज्छौं। अमेरिकी जनता र सरकारको तर्फबाट यस विशेष अवसरमा सम्पूर्ण नेपालीहरूमा हार्दिक मंगलमय शुभकामना व्यक्त गर्दछु।’
नेपालको वर्तमान संविधान २०७२ सेप्टेम्बर २०, २०१५ देखि लागु भएको हो । दोश्रो संविधान सभाको सफलताको फलस्वरूप यो संविधान लागु भएपछि नेपालको अन्तरिम संविधान २०६३ स्वतः निष्क्रिय भएको थियो ।
संविधान सभाको दोश्रो निर्वाचनबाट निर्वाचित संविधान सभाले २०७२ साल भदौ ३० गते यो संविधान २ तिहाई भन्दा बढी मतले पारित गरेको हो । साथै नेपालकै इतिहासमा जनता माझ गएर मस्यौदा तयार गरिएको यो पहिलो र विश्वको सबैभन्दा पछिल्लो संविधान हो । यो संविधान नब्बे प्रतिशतभन्दा बढीको बहुमतमा राष्ट्रपतिबाट घोषणा गरिएको हो ।
यो संविधान २०७२ असोज १ गते संविधानसभाका बहुमत सदस्यहरूबाट हस्ताक्षर भएपछि सभाध्यक्षबाट प्रमाणित गरिएको थियो । संविधान २०७२ असोज ३ गते नेपालका राष्ट्रपति रामवरण यादवले नेपालको संविधान २०७२ मा हस्ताक्षर गर्दै संविधान जारी भएको घोषणा गरी लागू गरिएको हो ।
यस संविधानमा ३५ भाग ३०८ वटा धारा र ९ वटा अनुसूचीहरू रहेका छन् । संविधानले नेपाललाई पहिलो पटक धर्म निरपेक्ष राज्य घोषित गरेको थियो ।