प्रधानमन्त्री दाहाल न्यूयोर्कमा, बाइडेनको रिसेप्सनमा सहभागी हुने
प्रकाशित मिति : भाद्र ३१, २०८० आईतबार
संयुक्त राष्ट्रसङ्घको ७८औँ महासभामा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री पुष्पकमल दाहाल ‘प्रचण्ड’ अमेरिकाको न्यूयोर्क आइपुगेका छन् ।
प्रधानमन्त्री दाहाललाई परराष्ट्रमन्त्री एनपी साउदले स्वागत गरे । प्रधानमन्त्रीको स्वागतमा अमेरिकाका लागि नेपालका राजदूत श्रीधर खत्री, संयुक्त राष्ट्रसङ्घका लागि स्थायी नियोग प्रमुख लोकबहादुर थापालगायत सरकारी अधिकारीहरू उपस्थित थिए ।
प्रधानमन्त्री दाहालले संयुक्त राष्ट्रसङ्घको महासभालाई असोज ४ गते सम्बोधन गर्ने कार्यतालिका रहेको छ । यसपटकको महासभामा प्रधानमन्त्रीले ‘विश्व समुदायको विश्वास पुनः जागृत गर्ने तथा शान्ति, समृद्धि र सबै दिगोपनाका निम्ति दिगो विकासका लक्ष्य हासिल गर्ने ऐक्यबद्धताबारे’ सम्बोधन गर्ने जनाइएको छ ।
न्युयोर्कमा रहँदा प्रचण्डले संयुक्त राष्ट्रसङ्घको दिगो विकास र जलवायुसम्बन्धी शिखर सम्मेलनलगायत कार्यक्रमलाई सम्बोधन गर्नेछन् ।
महासभाकै क्रममा प्रधानमन्त्री दाहालले विभिन्न देशका राष्ट्रप्रमुख तथा सरकार प्रमुखहरूसँग ‘साइडलाइन’ भेटघाट गर्नेछन् । राष्ट्रपति जो बाइडेनले आयोजना गर्नुहुने स्वागत समारोहमा प्रधानमन्त्री दाहाल सहभागी हुनेछन् ।
न्युयोर्क भ्रमणका क्रममा के प्रचण्ड र अमेरिकी राष्ट्रपति जो बाइडेनबीच छुट्टै भेटघाट पनि हुनेछ ?
अमेरिकी राष्ट्रपतिले विश्वका नेताहरुलाई दिने सामुहिक स्वागत बाहेक नेपालका प्रधानमन्त्रीसँग छुट्टै भेटघाटको कार्यक्रम भने अहिलेसम्म तय भइनसकेको ह्वाइटहाउसले खसोखासलाई जानकारी दिएको छ ।
राष्ट्रपतिका लागि एक्जुक्युटिभ अफिस र ह्वाइट हाउसका लागि नेशनल सेक्युरिटी काउन्सिलले दिएको जानकारी अनुशार बाइडेनले नेपालका प्रधानमन्त्रीलाई छुट्टै भेट्ने कुनै कार्यक्रम रहेको छैन भने अमेरिकी विदेशमन्त्रीसँग पनि नेपालका अधिकारीहरुको भेटघाटको कार्यक्रम छैन ।
ह्वाइट हाउसको नेशनल सेक्युरिटी काउन्सिलमा कार्यरत एकजना सहायक प्रेस सेक्रेटरी तथा स्ट्राटेजिक कम्युनिकेशन निर्देशकले अहिले कार्यक्रम तय भइनसकेको भएतापनि आगामी दिनमा राष्ट्रपतिको तालिकाबारे थप जानकारी हुने बताएका छन् । नेपालको परराष्ट्र श्रोतले पनि प्रचण्ड र बाइडेनबीच छुट्टै भेटघाटको कुनै तालिका तय नभएको जनाएको छ ।
संयुक्त राष्ट्रसंघ महासभाका बेलामा अमेरिकी राष्ट्रपतिले राष्ट्रप्रमुखहरुका लागि रिसेप्सेन पार्टीको आयोजना गर्ने प्रचलन समेत रहेको छ । जस अनुशार विभिन्न देशका राष्ट्रप्रमुख र अमेरिकी राष्ट्रपति दम्पत्तिको फोटो सेसन हुने गर्छ । यो रिसेप्सनमा नेपालका प्रधानमन्त्री सहित सबै देशका राष्ट्रप्रमुखहरुलाई अमेरिकी राष्ट्रपतिले २ मिनेट वा त्यो भन्दा अझ कम समय भेट्ने कार्यक्रम हुन्छ ।
यो रिसेप्नसमा सबै देशका राष्ट्रप्रमुखसँग सामान्य हालखबर सोध्ने र फोटो खिच्नेमात्र काम हुन्छ । यद्यपी आफूले महत्व दिएका राष्ट्रप्रमुखहरुलाई अमेरिकी राष्ट्रपतिले रिसेप्सेन कार्यक्रम बाहेक अरु समयमा छुट्टै भेटघाट समेत गर्ने गर्छन् ।
प्रधानमन्त्रीलाई ढोका बाहिरसम्म छोड्न राष्ट्रसंघका लागि नेपाल मिसनको कार्यालय कर्मचारीहरु र अन्य अधिकारीहरु पनि जाने गर्छन् । त्यसपछि भित्र पसेपछि आफ्नो पालो आउनासाथ नेपालका प्रधानमन्त्रीले अमेरिकी राष्ट्रपतिलाई भेटेर फोटो खिच्छन् । यो भेटमा सञ्चै हुनुहुन्छ रु भनेर सामान्य व्यक्तिगत हालखबर सोध्नेबाहेक अरु कुराकानी हुँदैन ।