दक्षिणी क्यालिफोर्नियामा ट्रकलाई ठक्कर दिएपछि १९८ यात्रु बोकेको एमट्रयाक रेल लिकबाट बाहिर खस्यो
प्रकाशित मिति : असार १३, २०८० बुधबार
बुधबार दक्षिणी क्यालिफोर्नियामा १९८ जना यात्रु बोकेको एउटा एमट्रयाक ट्रेनले काउन्टी वर्क ट्रकलाई ठक्कर दिएपछि लिकबाट बाहिर खसेको छ । दुर्घटनामा ट्रकका चालकलाई गम्भीर चोट लागेको अधिकारीहरूले बताएका छन् ।
मुरपार्कमा ठोक्किएपछि रेलका सातवटा डिब्बामध्ये तीनवटा लिकबाट खसेको भेन्टुरा काउन्टी फायर डिपार्टमेन्टका क्याप्टेन ब्रायन म्याकग्राले बताएका छन् । ट्रेनमा रहेका १४ जनालाई सामान्य चोटपटकका साथ अस्पताल लगिएको थियो भने ट्रक चालकलाई टाउकोमा चोट लागेको अवस्थामा ट्रमा सेन्टरमा लगिएको थियो ।
ध्वस्त भेन्टुरा काउन्टी पब्लिक वर्क्स ट्रकका भागहरू पटरीबाट खसेका रेल डिब्बा वरिपरि छरिएका थिए। सुरुमा ट्रकका चालक दुर्घटना हुनु अघि गाडीबाट बाहिर हामफालेको विश्वास गरिएको थियो ।
चालकसँग कुराकानी हुन नपाएकाले सम्पूर्ण अवस्थाबारे अनुसन्धान भइरहेको जनाइएको छ । लिकबाट झरेका रेलका डिब्बाहरु बगैंचा र जमिनको खाली भागको छेउमा रहेको ट्र्याकहरूमा सीधा रहेका थिए ।
अधिकांश यात्रुहरू आफैं वा उद्दारकर्मीको सहायताले ट्रेनका डिब्बाबाट ओर्लन सक्षम भएका थिए । ट्रेन सियाटलबाट लस एन्जलस जाँदै थियो । दुर्घटना बिहान ११ बजेर १५ मिनेटमा भएको एमट्रयाकले जारी गरेको विज्ञप्तीमा जनाइएको छ ।
ट्रेनमा १९८ यात्रु र १३ चालक दलका सदस्यहरू समेत थिए । एमट्रयाकले वैकल्पिक यात्रा व्यवस्था गर्न ग्राहकहरुसँग काम गरिरहेको छ। टोलीले तुरुन्तै सानो आगो निभाउन सक्षम भएका थिए ।