प्रधानमन्त्री प्रचण्ड अमेरिका आउँदै, संयुक्त राष्ट्रसंघको महासभामा सम्बोधन गर्ने
प्रकाशित मिति : भाद्र २१, २०७३ मंगलबार
संयुक्त राष्ट्रसंघको ७१औं महासभामा सहभागी हुन प्रधानमन्त्री पुष्पकमल दाहाल प्रचण्ड सेप्टेमबर दोस्रो साता त्यसतर्फ जानुहुने कार्यक्रम तय भएको छ ।
सेप्टेम्बर १३ मा उद्घाटन गरिने राष्ट्रसंघको महासभामा सेप्टेम्बर २० देखि छलफल सत्र सुरु हुनेछ ।
७१ औं महासभालाई प्रधानमन्त्री प्रचण्ड र परराष्ट्रमन्त्री डाक्टर प्रकाशशरण महतले सम्बोधन गर्नुहुने कार्यक्रम छ । प्रधानमन्त्री प्रचण्डले महासभामा ६९ मुलुकका राष्ट्र तथा सरकार प्रमुखका मन्तब्य सुनेपछि आफ्नो मन्तव्य दिनुहुनेछ । सेप्टेम्बर २० मा ब्राजिलका नया राष्ट्रपतिको सम्बोधनबाट आरम्भ हुने सम्मेलनलाई लगत्तै अमेरिकी राष्ट्रपति बाराक ओबामाले सम्बोधन गर्नेछन् । त्यसको चार दिनपछि सेप्टेम्बर २४ मा प्रचण्डको सम्बोधन गर्नुहुने छ ।
राष्ट्र प्रमुखहरूको सम्बोधन सकिएपछि सरकार प्रमुखको पालो आउने भए पनि बेलायत, चीन, इजरायल, जापान, स्पेन लगायतका प्रधानमन्त्रीहरूले राष्ट्रप्रमुख अगावै सम्बोधन गर्ने तयारी छ । नेपालले भने बैठकलाई सम्बोधन गर्ने नेताको नाम दिन ढिलाई गर्दा ७०औं नम्बरमा पुगेको हो । विगतको महासभामा जस्तै यस पटकको बैठकमा विश्वका चर्चित र शक्तिशाली भनिएका नेताहरूको खासै उपस्थिति नहुने भएको छ । महासभामा चिनिया“ राष्ट्रपति सी जिनपिङ, भारतीय प्रधानमन्त्री नरेन्द्र मोदी, रुसी राष्ट्रपति भ्लादिमिर पुटिन, जर्मन चान्सलर एन्जेला मार्केल लगायत राष्ट्र र सरकार प्रमुखहरूको सहभागिता नहुने भएको हो ।
राष्ट्रसंघले तयार गरेको कार्यक्रम सूचीमा यी हस्तीहरुको नाम समावेश छैन । प्रभावशाली नेताहरु महासंघमा सहभागी नहुनुमा चीनको ह्वाङजाउमा भएको जी–ट्वेन्टी बैठकलाई समेत कारण मानिएको छ ।