Follow @khasokhasmag

केसीको स्वास्थ्य जोखिममा


प्रकाशित मिति : श्रावण २६, २०७४ बिहीबार

– अतुल मिश्र

श्रावण २६, २०७४- चिकित्सा शिक्षा र सेवा सुधारका माग राख्दै १७ दिनदेखि अनशनरत प्रा.डा. गोविन्द केसीको स्वास्थ्य स्थिति अत्यन्तै जटिल भएको भन्दै चिकित्सकहरूले कुनै पनि बेला ज्यान जोखिममा पर्न सक्ने चेतावनी दिएका छन् । ‘हालको स्थिति विचार गर्दा उनको ज्यान जोखिममा पर्ने शारीरिक जटिलता देखिन सक्छ,’ प्रा.डा. दिव्या सिंह शाहले भनिन्, ‘कुनै पनि समय उनलाई आकस्मिक मेडिकल रिससिटैसन (मृत:प्रायलाई जीवित गर्ने प्रक्रिया) आवश्यक पर्न सक्छ ।’ हाल उनलाई चौबीसै घण्टा अक्सिजन दिइएको छ । डा. केसीमा बोल्न गाह्रो हुने, रिंगटा लाग्ने र शिथिल हुने लक्षण देखिएका छन् । बस्दा र पल्टँदासमेत रिंगटा लाग्छ भने मांसपेशी बाउँडिने र छाती दुख्ने समस्या पहिलेको भन्दा बढेको छ । उनको शरीर अति कमजोर रहेकाले सम्भावित संक्रमणलाई दृष्टिगत गर्दै भेटघाट गर्न आउनेलाई नजिकै जान दिइएको छैन ।

यसैबीच, त्रिवि शिक्षण अस्पतालका आवासीय चिकित्सकले डा. केसीका मागको समर्थनमा सरकारलाई दबाब दिन बुधबारदेखि आकस्मिक बाहेकका सेवा बहिष्कार गरेका छन् । नेसनल रेजिडेन्ट डाक्टर्स एसोसिएसनका सचिव डा. अमितकुमार यादवका अनुसार सरकारले अब पनि डा. केसीका माग पूरा नगरे थप कडा विरोधका कार्यक्रम ल्याइने छन् । मुलुकभरका सरकारी चिकित्सकले डा. केसीको समर्थनमा बुधबार कालोपट्टी लगाएर काम गरे । सरकारी चिकित्सक संघ (गोडान) को आह्वानमा चिकित्सकहरू विरोधमा उत्रिएको गोडान प्रवक्ता डा. सुजितकुमार झाले बताए । बिहीबारसम्म ठोस निर्णय नभए थप कडा विरोधका कार्यक्रम सार्वजनिक गरिने उनले बताए ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com