लिस्बनमा बस्ने आप्रवासीमा नेपाली टपफाइभ, आवासीय अनुमतिका साथ बस्ने नेपाली ८८७५
प्रकाशित मिति : फाल्गुन १६, २०७९ मंगलबार
पोर्चुगलको लिस्बनमा आवासीय अनुमतिका साथ बसोबास गर्ने नेपालीहरुको संख्या ८ हजार ८ सय ७५ रहेको पोर्चुगल अध्यागमन र सीमा सेवा सेफले खुलासा गरेको छ । लिस्बनमा विदेशी बासिन्दाहरूको बारेमा छलफल गर्नको लागि बैठकले सहरमा कति देशका नागरिकहरुको मुख्य बसोबास रहेको छ भन्ने खुलासा गरेको छ ।
विदेशी र सीमा सेवाका राष्ट्रिय अधिकारीहरुले लिस्बन सिटी काउन्सिलका काउन्सिलरहरू फिलिपा रोजेटा , सोफिया एथेडे र एन्जेलो परेरा र सँग भेटेका हुन् । बैठकमा नागरिकहरूको बसाइको सन्दर्भमा सेफको नियन्त्रण र पर्यवेक्षणको अधिकारको दायरा, लिस्बनको नगर क्षेत्रमा बसोबास गर्ने विदेशी जनसंख्याको तथ्याङ्कीय जानकारीको आदानप्रदान र संयुक्त कार्यको लागि रणनीतिहरूबारे छलफल भएको थियो ।
यस बैठकपछि सेफले आफ्नो फेसबुक पेजमा गत वर्षको अन्त्यमा लिस्बन नगरमा १ लाख १८ हजार ९४७ विदेशी नागरिकको बसोबास रहेकोमा ब्राजिलका २२ हजार ०८०, इटालीका ९ हजार ३९१, फ्रान्सका ९ हजार ०३३, नेपालका ८ हजार ८७५ र बंगलादेशका ८ हजार ४८६ जना आवासीय अनुमतिपत्रसहित बसोबास गरिरहेको खुलासा गरेको हो । सेफका अनुशार आवासीय अनुमतिपत्रका साथ बस्ने नेपालीहरु लिस्बनमा टपफाइभमा रहेका छन् ।
पोर्चुगलभर आवासीय अनुमतिका साथ बस्ने नेपाली २३ हजार ४ सय ४१
पोर्चुगलभर आवासीय अनुमतिका साथ कानुनी रूपमा बसोबास गर्ने नेपालीहरुको संख्या भने २३ हजार ४ सय ४१ रहेको सेफले जनाएको छ । नेपालीहरू पोर्चुगलका बस्ने टप टेन आप्रवासीहरुमा परेका छन् । नेपालीहरुले अब पोर्चुगलमा आवासीय अनुमतिका साथ बस्ने चिनियाहरुलाई उछिनेका छन् ।
सेफका अनुसार पोर्चुगलमा आवासीय अनुमतिका साथ बसोबास गर्ने मुख्य विदेशी समुदायहरूमा ब्राजिलका २ लाख ३३ हजार १३८, युनाइटेड किंगडमका ३६ हजार ६३९, केप भर्डेका ३५ हजार ७४४, भारतका ३४ हजार २३२, इटालीका ३३ हजार ७०७, अंगोलाका ३० हजार ४१७, फ्रान्सका २७ हजार ६१४, युक्रेनका २६ हजार ८९८, रोमानियाका २३ हजार ९६७ र नेपालका २३ हजार ४४१ रहेका छन् ।
अहिलेसम्म बसाईसराईका लागि पोर्चुगल आउने नेपालीहरुको संख्या भने ५० हजारको हाराहारीमा रहेको अनुमान गरिएको छ । उनीहरुमध्ये कैयन आवासीय अनुमतिको प्रतिक्षामा छन् । तर कैयन नेपालीहरु आवासीय अनुमति वा पासपोर्ट प्राप्त गरिसकेपछि पोर्चुगलबाहिर समेत जाने गरेका छन् ।