न्युयोर्कमा इमिग्रेशन छापामा ३५ देशका ११४ पक्राउ (विस्तृत विवरण)
अध्यागमन कारवाहीमा इमिग्रेशन एण्ड कस्टम इन्फोर्समेन्ट आइसले न्युयोर्क सिटीबाट ११४ जना कागजपत्रविहिन आप्रवासीहरुलाई पक्राउ गरेको जनाएको छ । जुलाईमा आइसले न्युयोर्कसिटीमा ११ दिने अपरेशन संचालन गरेको थियो । आइसले अपरेशनका क्रममा ११४ जना पक्राउ गरेकोमा ९९ जना सिटीमा नै बस्नेहरु रहेको जनाएको छ । म्यानहटनमा ३६ जना, क्वीन्समा ३२ जना, बु्रकलिनमा १५ जना र ब्रोंक्समा ११ जनालाई पक्राउ गरेको आइसले जनाएको छ ।
आइसको यो छापालाई न्युयोर्क इमिग्रेशन कोलिसनकी निर्देशक अनु जोशीले ट्रम्पको अमानवीय अध्यागमन नीति कार्यान्वयनको स्पष्ट उदाहरण भएको बताएकी छिन् । आइसले भने अध्यागमनका फरारहरु, गैरकानुनी रुपमा पुन अमेरिका छिरेकाहरु र फरार रहेका अपराधीहरुलाई निशाना बनाएको जनाएको छ । यो ११ दिने आइसको अपरेशन ट्रम्पले कार्यभार सम्हालेपछि सम्भवत सबैभन्दा ठूलो अपरेशन हुनसक्ने जनाइएको छ ।
यो पक्राउ आइसले यो महिना गरेको दोश्रो ठूलो घोषणा हो । न्युयोर्कमा भन्दा धेरै टेक्सासमा १२३ जना आप्रवासीहरुलाई आइसले यसैमहिना नियन्त्रणमा लिएको थियो । जुलाइ २१ मा आइसले जारी गरेको वक्तब्यमा साउथ र सेन्ट्रल टेक्सासमा उनीहरुलाई पक्राउ गरिएको जनाइएको छ ।
न्युयोर्कमा पक्राउ परेकाहरुमध्ये १०४ जना पुरुष र १० जना महिलाहरु रहेका छन् । उनीहरुमा १ जना अफगानिस्तान, १ जना अल्जेरिया, २ जना बंगालादेश, १ जना बार्बादोष, ३ जना चीन, ३ जना कोलम्बिया, १ जना कोस्टारिका, १५ जना डोमेनिकन रिपब्लिक, १६ जना इक्वेडर, १ जना इजिप्ट, ६ जना एल साल्भाडोर, १ जना गाम्बिया, १ जना जर्जिया, १ जना ग्रेनाडा, ५ जना ग्वाटेमाला, १ जना गायना, ५ जना हैटी, ४ जना होण्डुरस, १ जना इन्डिया, १ जना इन्डोनेशिया, १ जना इजरायल, १ जना आइभरी कोष्ट, ८ जना जमैका, १ जना जोर्डन, २१ जना मेक्सिको, १ जना मोन्टेनेग्रो, १ जना नाइजर, १ जना पाकिस्तान, १ जना पोल्याण्ड, १ जना रोमानिया, १ जना स्पेन, १ जना साउथ कोरिया, ३ जना ट्रिनिडाड, १ जना टर्की र १ जना बेलायतका नागरिक रहेका छन् । उनीहरुमध्ये सबैभन्दा धेरै १७ जना मादक पदार्थ सेवन गरेर गाडी चलाएको अभियोग लागेकाहरु छन् ।
