त्रिभुवन अन्तर्राष्ट्रिय विमानस्थलबाट ९ किलो सुनसहित क्यानडाली नागरिक पक्राउ
प्रकाशित मिति : माघ १८, २०७९ बुधबार
त्रिभुवन अन्तर्राष्ट्रिय विमानस्थलबाट ९ किलो सुनसहित क्यानडाका नागरिक पक्राउ परेका छन् । त्रिभुवन विमानस्थल भन्सार कार्यालयका प्रवक्ता यमराज पाण्डेका अनुसार दुबईबाट फ्लाइ दुबईको उडान नम्बर एफ२५७३ मा गएराति १२ बजे विमानस्थल भन्सारले सुनसहित नियन्त्रणमा लिएको हो ।
पक्राउ पर्नेमा क्यानडाको पासपोर्ट र अबुधावी बर्थप्लेस भएका ३५ वर्षीय मोहम्मद कमल मोहगोब रहेका छन् । उनी पहिलो पटक नेपाल आएको पाण्डेको भनाइ छ ।
उनले शरीरमा पेटी बनाएर १ किलोका ८ वटा बिस्कुट आकारको सुन र एक किलो गोलाकार सुन भेटिएको प्रवक्ता पाण्डेले बताए । उनीबारे थप अनुसन्धान भइरहेको विमानस्थल भन्सार कार्यालयले जानकारी दिएको छ ।