न्युयोर्कमा शनिबारदेखि तापक्रम माइनसमा झर्ने, आगामी बिहिबार माइनस ४ डिग्री सेल्सियस
प्रकाशित मिति : मंसिर १, २०७९ बिहीबार
न्युयोर्कमा आइतबारदेखि चिसो मौषम सुरुवात भएकोमा शनिबारबाट तापक्रम माइनसमा झर्ने भएको छ । शनिबार तापक्रम माइनस २ डिग्री सेल्सियसमा झर्ने पूर्वानुमान रहेको छ भने आइतबार पनि माइनस २ डिग्री सेल्सियससम्म झर्नेछ ।
सोमबार माइनस ३ डिग्री सेल्सियससम्म झर्ने अनुमान गरिएको छ भने मंगलबार शुन्य सेल्सियससम्म झर्नेछ । बिहिबार माइनस ४ डिग्री सेल्सियससम्म झर्ने अनुमान गरिएकोमा त्यसपछिका केहीदिन तापक्रम माइनसमा नै रहनेछ ।
यसपटक उत्तरी गोलार्धको जाडोमा ला निना अवस्थाको सम्भावना ७६ प्रतिशत रहेको अमेरिकी सरकारको मौसम पूर्वानुमानकर्ताले बताएका छन् । भूमध्यमण्डलीय प्रशान्त महासागरमा असामान्य रूपमा चिसो तापक्रमका कारण मौसमको ला निना अवस्था आउनेगर्छ ।
ला निना अवधिमा मध्य प्रशान्त महासागरको पूर्वी भूमध्य भागमा समुद्री सतहको तापक्रम सामान्य भन्दा कम हुनेछ। ला निनाको उपस्थिति प्रायः पाँच महिना भन्दा लामो समयसम्म रहन्छ।
ला निनाले विश्वव्यापी जलवायुलाई असर गर्छ र सामान्य मौसमको ढाँचामा बाधा पुर्याउँछ, जसले केही ठाउँमा तीव्र आँधी र अरूमा खडेरी निम्त्याउन सक्छ। २०२० को अप्रिलतिर ला निनाले ओरेगन राज्यमा औसत भन्दा माथि वर्षा र कम औसत तापक्रम निम्त्याएको थियो । अप्रिल सबैभन्दा चिसो महिनाहरू मध्ये एक थियो ।