बेलायतको संसदभित्र प्रदर्शनकारी प्रवेश, मानव साङ्लो बनाएर सभामुखको कुर्सी घेरे (भिडियो)
प्रकाशित मिति : भाद्र १७, २०७९ शुक्रबार
बेलायती संसदमा प्रदर्शनकारीहरू प्रवेश गरेपछि हंगामा भएको छ। आन्दोलनकारीहरु सभामुखको कुर्सी घेर्न पुगेका छन् । सभामुखको कुर्सी घेर्न पुगेपछि उनीहरुले संसदभित्र विभिन्न पोस्टर प्रदर्शन गरे । अराजक स्थितिपछि कारबाहीमा आएको लण्डन प्रहरीले धेरै प्रदर्शनकारीलाई पक्राउ गरेको छ ।
यो घटनापछि बेलायती संसदको सुरक्षामा ठूलो संख्यामा प्रहरी तैनाथ गरिएको छ । अहिले पनि संसद भवन वरपर आन्दोलनकारी, प्रहरी र सञ्चारमाध्यमको भिड लागेको छ ।
बेलायती सञ्चारमाध्यमका अनुसार वातावरण संरक्षण संगठन एक्स्टिन्क्शन रिबेलियनका कार्यकर्ताहरूले शुक्रबार बेलायतको संसदमा प्रवेश गरी मानव साङ्लो बनाएर हाउस अफ कमन्सको सभामुखले प्रयोग गरेको कुर्सी घेरा हालेका छन ।
देशको कन्जरभेटिभ पार्टीले नयाँ नेता चयन गर्न सात हप्ता लामो चुनावी अभियान पूरा गर्ने तयारी गरिरहेको बेला यो प्रदर्शन भएको हो। अहिले बेलायतको संसदको बैठक चलिरहेको छैन । प्रदर्शनकारीलाई तितरबितर गर्नका लागि घटनास्थलमा कैयौं प्रहरी टोली परिचालन गरिएको थियो।