रुसद्वारा युक्रेनको रेलवे स्टेशनमा मिसाइल प्रहार, २२ जनाको मृत्यु, ५० घाइते
प्रकाशित मिति : भाद्र ८, २०७९ बुधबार
युक्रेनले आफ्नो एउटा रेलवे स्टेशनमा रुसी रकेट आक्रमणमा २२ जनाको मृत्यु भएको र कैयौँ घाइते भएको बताएको छ । रुसले युक्रेनमा आक्रमण गरेको ६ महिना पूरा भएको दिनमै यतिधेरै जनाको ज्यान जानेगरि यो आक्रमण भएको हो ।
युक्रेनले आक्रमण पूर्वी सहर च्याप्लिनमा भएको बताएको छ, जहाँ एक गाडीमा सवार पाँच जना आक्रमणपछि गाडीमै जलेर मृत्यु भएको बताइएको छ । जसमध्ये एक ११ वर्षीय बालक पनि थिए ।
युक्रेनी राष्ट्रपति भोलोडिमिर जेलेन्स्कीले संयुक्त राष्ट्र सुरक्षा परिषद्को बैठकको बीचमा आक्रमणको बारेमा जानकारी दिए। यस आक्रमणमा करिब ५० जना घाइते भएको उनले बताए ।
रुसले अहिलेसम्म कुनै प्रतिक्रिया दिएको छैन । तर, रुसले नागरिक बसोबास गर्ने ठाउँमा आक्रमण नगर्ने बताउँदै आएको छ ।
जेलेन्स्कीले सुरक्षा परिषद्को बैठकमा बोल्ने तयारी गर्दै गर्दा च्याप्लिनको आक्रमणबारे थाहा पाएको बताए। “यस्तै रुसले संयुक्त राष्ट्र सुरक्षा परिषद्को बैठकको लागि तयारी गरिरहेको छ,” उनले भने।
चारवटा बोगीमा आगो लागेको र मृत्यु हुनेको संख्या बढ्न सक्ने उनले बताए । यसअघि अप्रिलमा पनि एउटा रेलवे स्टेशनमा हमला भएको थियो, जसमा ५० भन्दा बढी व्यक्तिको मृत्यु भएको थियो।