१० हजार डलरसम्म विद्यार्थी ऋण मिनाहा गर्ने बाइडेनको घोषणा, ऋण भुक्तानमा स्थगन यो बर्षभर
प्रकाशित मिति : भाद्र ८, २०७९ बुधबार
अमेरिकी राष्ट्रपति जो बाइडेनले १ लाख २५ हजारभन्दा कम आम्दानी हुनेहरुको १० हजार डलरसम्मको विद्यार्थी ऋण मिनाहा गर्ने आफ्नो योजना घोषणा गरेका छन् । त्यस्तै ऋणको भुक्तानीमा स्थगनलाई पनि यो बर्षको अन्तिमसम्म विस्तार गर्ने भएका छन् ।
बुधबार बिहान बाइडेनले ट्वीट गर्दै पेल अनुदानमा कलेज गएका कम आय भएकाहरुको मिनाहा रकम अझ बढी हुने बताएका छन् । पेल अनुदानमा कलेज गएकाहरूको २० हजार डलरसम्म विद्यार्थी ऋण मिनाहा गरिने भएको छ । अण्डरग्रयाजुएट संघीय ऋण भएकाहरूले उनीहरूको मासिक आम्दानीको ५ प्रतिशतमा आफ्नो भुक्तानी पनि सीमित गर्न सक्नेछन् ।
In keeping with my campaign promise, my Administration is announcing a plan to give working and middle class families breathing room as they prepare to resume federal student loan payments in January 2023.
I’ll have more details this afternoon. pic.twitter.com/kuZNqoMe4I
— President Biden (@POTUS) August 24, 2022
ह्वाइट हाउसले संघीय विद्यार्थी ऋण भुक्तानमा अगस्ट ३१ सम्म गरेको स्थगन थप यो बर्षभरी थप्ने र सन् २०२३ बाट भुक्तानी सुचारु गर्ने पनि बाइडेनले बताएका छन् । कोभिड १९ महामारीले अर्थतन्त्रमा ठूलो असर पारेपछि मार्च २०२० देखि अधिकांश संघीय विद्यार्थी ऋणहरूमा भुक्तानी आवश्यक परेको छैन । बाइडेनले यो स्थगन चार पटकसम्म विस्तार गरिसकेका छन् ।
चक शुमर, एलिजाबेथ वारेन लगायतका केही डेमोक्रेटिक सांसदहरूले ५० हजार डलरसम्मको विद्यार्थी ऋण मिनाहा गर्न आग्रह गर्दै आएका थिए । तर राष्ट्रपतिले विद्यार्थी ऋण मिनाहाको निर्णय लगातार पछाडि धकेल्दै आएका थिए ।
बाइडेनले कुनै पनि अन्य राष्ट्रपतिले भन्दा बढी विद्यार्थी ऋण मिनाहा गरिसकेका छन् । उनको प्रशासनले यस अगाडि पनि लगभग ३१ बिलियन ऋण रद्द गर्ने अधिकार दिएको थियो ।