मेडिकल छात्रालाई यौन दुर्व्यवहार गर्ने मुख्य आरोपीलाई वकिलहरूले गरे कुटपिट
प्रकाशित मिति : भाद्र ३, २०७९ शुक्रबार
पाकिस्तानको पञ्जाब प्रान्तमा वकिलहरूले मेडिकल छात्रालाई यौन दुर्व्यवहार गर्ने मुख्य आरोपीलाई कुटपिट गरेका छन् । बिहीबार प्रहरीले मुख्य अभियुक्त र उनका सहयोगीहरूलाई फैसलाबाद अदालतमा हाजिरीका लागि लैजाँदै गर्दा वकिलहरूले घेरेर कुटपिट गरेका थिए । प्रहरीले कुनै न कुनै तरिकाले अभियुक्तलाई बचाएर अदालतमा पेस गरेको थियो ।
प्रहरीका अनुसार शेख दानिश नामका उद्योगपतिले मेडिकल छात्रालाई विवाहको प्रस्ताव राखेका थिए । अस्वीकार गर्दा बालिकालाई निर्मम यातना र यौन दुव्र्यवहार गरिएको थियो । घटनाको भिडियो मंगलबार भाइरल भएपछि प्रहरी सक्रिय भएको हो । भिडियोमा मुख्य आरोपी दानिश र उनका सहयोगीहरूले बालिकाको कपाल र भौं काटेको देखाइएको छ । प्रहरीले दानिशसहित सात जनालाई पक्राउ गरेको छ ।
खतिजा महमुदमाथि ८ अगस्टमा लाहोरबाट १५० किलोमिटर टाढा फैसलाबादमा हमला भएको थियो । प्रहरीले अपहरणमा संलग्न १५ जनाविरुद्ध मुद्दा दर्ता गरेको छ । ती विद्यार्थी दन्तचिकित्साको अन्तिम वर्षमा अध्ययनरत छिन् । पञ्जाब पुलिसले भन्यो, ‘पुलिसले दानिश र उनकी छोरी सहित सात संदिग्धलाई पक्राउ गरेको छ। बाँकी अभियुक्तलाई प्रहरीले पक्राउ गर्ने प्रयास गरिरहेको छ ।’
पीडित युवती आफ्नी वृद्ध आमा र दुई भाइसँग बेलायतमा बस्दै आएकी थिइन् । उनले सहपाठी अन्नासँग कुराकानी भएको बताए । ‘अन्नाका बुवा शेख दानिशले मलाई विवाहको प्रस्ताव राखेका थिए तर मेरो परिवारले अस्वीकार गरे । दानिश मेरो बुबाको उमेरको हो र जब मैले अन्नालाई यो कुरा भनेँ उनी छक्क परिन्।’
८ अगष्टमा उसको भाइ बेलायत फर्कँदा दानिशले १४ जनालाई साथमा लिएर दाजुलाई विवाहको प्रस्ताव स्वीकार गर्न दबाब दिन थालेको पीडित छात्राले बताइन् । भाइले प्रस्ताव नमान्दा खातिजालाई यातना दिएर भाइलाई जबरजस्ती घरबाट निकालिदिएका थिए ।