लेखक सलमान रुस्दीमाथि न्युयोर्कमा भएको आक्रमणको बेलायती प्रधानमन्त्रीबाट निन्दा
प्रकाशित मिति : श्रावण २७, २०७९ शुक्रबार
बेलायतका प्रधानमन्त्री बोरिस जोनसनले चर्चित लेखक सलमान रुस्दीमाथि अमेरिकाको न्युयोर्कमा भएको आक्रमणको निन्दा गरेका छन् । उनले आक्रमणको निन्दा गर्दै रुस्दी ठीकठाक भएको आशा व्यक्त गरेका छन् । बेलायतका अन्य राजनीतिज्ञहरुले आक्रमणको निन्दा गरिरहँदा जोनसनको ट्वीट आएको हो ।
Appalled that Sir Salman Rushdie has been stabbed while exercising a right we should never cease to defend.
Right now my thoughts are with his loved ones. We are all hoping he is okay.
— Boris Johnson (@BorisJohnson) August 12, 2022
सलमान रुस्दीको शल्यक्रिया भइरहेको रोयटर्स समाचार एजेन्सीले उनको एजेन्टलाई उद्धृत गर्दै बताएको छ । आक्रमणकारीले स्टेजमा उभिरहेका सलमान रुस्दीलाई चक्कुले घाँटीमा आक्रमण गरेको प्रत्यक्षदर्शीहरुले बताएका छन् ।
रुस्दी उठेर भाग्न खोज्दा पछाडी लडेका थिए । धेरै मानिसहरू उनलाई सहयोगमा आएका थिए भने उनीहरुले आक्रमणकारीलाई रोकेका थिए । रुस्दीको कुर्सी पछाडिको पर्दा रगतमा लतपतिएको थियो ।
घटनास्थलमा पुगेका स्वास्थ्यकर्मीले रुस्दीलाई प्राथमिक उपचार गरेका थिए । त्यसपछि उनलाई उपचारका लागि हेलिकोप्टरबाट अस्पतालमा लगिएको थियो ।
बेलायतका सांसदहरुले बेलायती लेखक सलमान रुस्दीमाथि भएको आक्रमणको निन्दा गरेका छन् । कन्जरभेटिभ नेतृत्वका उम्मेदवार ऋषि सुनकले वाक स्वतन्त्रता र कलात्मक स्वतन्त्रताका च्याम्पियन रुस्दीमाथिको आक्रमणको खबर सुनेर आफू स्तब्ध भएको बताएका छन् ।
बेलायतका विजनेश सेक्रेटरी क्वासी क्वार्टेङले आफू डराएको उल्लेख गर्दै लेखकहरूलाई लेख्ने जत्तिकै जोगाउन आह्वान गरेका छन् ।
कल्चर सेक्रेटरी नादिन डोरिजले साहित्यिक विशाल र अभिव्यक्ति स्वतन्त्रताको महान रक्षकहरू मध्ये एकजनामाथि भयानक आक्रमण भएको भन्दै निन्दा गरेकी छिन् । स्टीफन किंग लगायतका लेखकहरुले पनि आक्रमणको निन्दा गरेका छन् ।
I hope Salman Rushdie is okay.
— Stephen King (@StephenKing) August 12, 2022
न्युयोर्ककी गभर्नर क्याथी होचुलले आक्रमणको निन्दा गर्दै मानिसहरूले सत्य बोल्न र लेख्न स्वतन्त्र महसुस गर्नु महत्त्वपूर्ण रहेको बताएकी छिन् ।
प्रहरीले आक्रमणकारीलाई पक्राउ गरेको बताइएको छ । आक्रमणको कारण भने अझै खुल्न सकेको छैन । सलमान रुस्दी आफ्नो पुस्तक द सैटर्निक भर्सेसका लागि कट्टरपन्थीको निशानामा परेका छन् । जसका कारण उनले धेरै वर्ष निर्वासनमा बस्नुपरेको थियो ।
सलमान रुस्दी भारतीय मूलका लेखक हुन् । उनले द सैटर्निक भर्सेस र मिडनाइट चिल्ड्रेन जस्ता प्रसिद्ध उपन्यासहरू लेखेका छन् । रुस्दीलाई सन् १९८१ मा मिडनाइट चिल्ड्रेनका लागि बुकर पुरस्कार प्रदान गरिएको थियो ।
सन् १९८८ मा आएको उनको चौथो उपन्यास द सैटानिक भर्सेसलाई लिएर पनि धेरै हंगामा भएको थियो । कट्टरपन्थीहरूले सलमान रुस्दीको मृत्युको फतवा पनि जारी गरेका थिए । सन् १९८९ मा इरानका सर्वोच्च नेता आयतोल्लाह रुहोल्लाह खोमेनीले पनि रुस्दीलाई ज्यान मार्ने धम्की दिएका थिए । त्यसपछि उनलाई बेलायती सरकारले प्रहरी सुरक्षा प्रदान गरेको थियो ।
सन् २००७ मा उनलाई बेलायती महारानीले साहित्यमा उनको सेवाको मान्यतामा ‘नाइट’को उपाधि दिएकी थिइन् । २००८ मा द टाइम्सले १९४५ पछि ५० उत्कृष्ट ब्रिटिश लेखकहरूको सूचीमा उनलाई तेह्रौं स्थानमा राखेको थियो ।
रुस्दी सन् २००० देखि अमेरिकामा बस्दै आएका छन् । उनलाई सन् २०१५ मा न्यूयोर्क विश्वविद्यालयको आर्थर एल कार्टर पत्रकारिता संस्थानमा प्रतिष्ठित लेखक नाम दिइएको थियो। त्यसअघि उनले एमोरी विश्वविद्यालयमा पढाउँथे।