चर्चित कवि पद्मश्री हलधर नागको बारेमा सामाजिक सञ्जालमा भाइरल गलत दाबी
चर्चित कवि पद्मश्री हलधर नागको बारेमा समय समयमा सामाजिक सञ्जालमा धेरै पोष्ट भाइरल हुने गरेका छन् । यतिबेला सामाजिक सञ्जालमा हलधर नागसँग सम्बन्धित एउटा पोस्ट भाइरल भइरहेको छ ।
यो पोष्टमा हलधर नागसँग पद्मश्री पुरस्कार लिन दिल्ली जाने पैसा नभएको उल्लेख छ । यो पोष्ट नेपालमा समेत सामाजिक सञ्जालमा ब्यापक शेयर भइरहेको छ । यस सम्बन्धमा नागले सरकारलाई पत्र लेखेर आफ्नो अवार्ड हुलाकबाट पठाउन आग्रह गरेको उल्लेख गरिएको छ ।
विगतमा पनि यस्ता दाबीसहितका पोस्ट भाइरल भएका थिए । अहिले यो पोस्ट फेरि भाइरल भएपछि मानिसहरू यसको सत्यता जान्न चाहन्छन्।
वास्तवमा, हलधर नागले सन् २०१६ मा पद्मश्री पुरस्कार पाएका थिए। त्यतीबेला उनले पद्मश्री पुरस्कार लिन दिल्ली बोलाउँदा आफ्नो गरिबीलाई उद्धृत गर्दै सरकारलाई कुनै चिठ्ठी लेखेका थिएनन् । न त पद्मश्री पुरस्कार हुलाकबाट पठाउने कुरा गरेका थिए ।
हलधर नागलाई पद्मश्री अवार्ड दिनुअघि नै उनलाई ओडिशाका मुख्यमन्त्री नवीन पटनायकले कलाकार भत्ता दिइरहेका थिए। ओडिशा सरकारले उनीहरूलाई बस्नको लागि जग्गा पनि दिएको छ, जसमा एक डाक्टरले आफ्नै खर्चमा घर पनि बनाइदिएका छन् । नागले सरकारबाट मासिक १८ हजार ५०० रुपैयाँ भत्ता पनि पाउँछन् ।
हलधर नागले यसअघि नै आफूलाई सन् २०१६ मा पद्मश्री पुरस्कार प्राप्त गर्नका लागि केन्द्र सरकारबाट पूर्ण सुविधा उपलब्ध गराएको स्पष्ट पारिसकेका छन् । उनलाई कारमा रायपुर लगिएको थियो र त्यहाँबाट विमानबाट दिल्ली लगिएपछि होटलमा राखिएको थियो ।
यस क्रममा उनलाई दिल्लीमा ओडिशा क्याडरका अधिकारीहरूले पनि पूर्ण सहयोग गरेका थिए। भाइरल पोष्टका बारेमा हलधर नागले सामाजिक सञ्जालमा लगातार झूटा पोस्ट भाइरल भइरहेको बताएका छन् । कहिले पानी र भात खाएको देखाएर त कहिले चना बेचेर बदनाम गरिएको भन्दै उनले गुनासो गरेका छन् । कहिलेकाहीँ उनको आवाजको नक्कल गरेर समेत पोस्ट अपलोड गरिन्छ। यस्ता पोष्टबाट गहिरो चोट लागेको उनले बताउँदै आएका छन् ।
पद्मश्री डा हलधर नागको जन्म ३१ मार्च १९५० मा ओडिशाको बरगढ जिल्लाको गेन्स गाउँमा भएको थियो। उनको परिवार निकै गरिब थियो । बुबाको मृत्यु हुँदा नाग सानै थिए । परिवारको आर्थिक अवस्था कमजोर भएकाले उनले तीन कक्षासम्म मात्रै पढ्न पाए । हलधर नागमा कविता लेख्ने एकदमै रहर थियो । जसका कारण उनी छिट्टै देशभर प्रसिद्ध भए । उनले लेखेका कवितामा धेरैले पीएचडी गरेका छन् । नागका धेरै प्रसिद्ध कृतिहरु संकलित हलधर ग्रन्थावलीलाई विश्वविद्यालयहरुको पाठ्यक्रममा पनि समावेश गरिएको छ।
खबर अबतकबाट
