नेपालका लागि नयाँ अमेरिकी राजदूतमा डिन टम्पसनको नियुक्तीबारे सिनेट समितिमा सुनुवाई
प्रकाशित मिति : असार ३०, २०७९ बिहीबार
नेपालका लागि नयाँ अमेरिकी राजदूतमा डिन टम्पसनको नियुक्तीबारे अमेरिकी सिनेटको वैदेशिक सम्बन्ध समितिमा सुनुवाई भएको छ । टम्पसनको नियुक्तीको प्रस्ताव ह्वाइट हाउसले सिनेटमा पठाएकोमा बुधबार सिनेटको वैदेशिक सम्बन्ध समितिमा नियुक्तीबारे सुनुवाई भएको हो ।
टम्पसनको नियुक्ती प्रस्ताव अप्रिलको पहिलो साता सिनेटमा पठाइएको हो । मार्च २९ मा अमेरिकी राष्ट्रपति जो बाइडेनले नेपालका लागि नयाँ राजदूतमा डिन टम्पसनलाई नियुक्तीको प्रस्ताव गरेका थिए । सिनेटको समितिमा भएको सुनुवाईपछि नियुक्तीको प्रस्ताव पारित गर्ने प्रावधान रहेको छ ।
सिनेटको सुनुवाईमा प्रस्तावित राजदूत टम्पसनले आफ्नो वयान दिएका थिए भने समितिका बरिष्ठ सिनेटरहरुले विभिन्न प्रश्नहरु राखेका थिए । सुनुवाईमा सिनेटर क्रिस भ्यान होलेनले टम्पसनको पृष्ठभूमिसहित परिचय दिएका थिए । सुनुवाईका क्रममा सिनेटरहरु मिट रोम्नी, बेन कार्डेन, ब्रायन शाट्स, क्रिस कुन्स, एड मार्के लगायतले नियुक्ती प्रस्ताव गरिएका कुटनीतिज्ञहरुलाई विभिन्न प्रश्नहरु सोधेका थिए ।
२५ वर्ष अमेरिकी परराष्ट्र सेवामा बिताएका थम्पसनले यस अगाडि अमेरिकी विदेश मन्त्रालयमा दक्षिण तथा मध्य एसियाली मामिलामा प्रिन्सिपल डेपुटी असिस्टेन्ट सेक्रेटरीका रूपमा काम गरेका छन् । सन् २०२० देखि सन् २०२१ सम्म उनले यो क्षेत्रका लागि कार्यवाहक असिस्टेन्ट सेक्रेटरीका रुमा काम गरेका थिए ।
त्यसअघि टम्पसन मलेसियाको क्वालालम्पुरस्थित अमेरिकी दूतावासमा नियोग उपप्रमुख रहेका थिए । रोमानियास्थित अमेरिकी दूतावासमा पनि काम गरेका उनले कलकत्तामा अमेरिकी महावाणिज्यदूतका रूपमा काम गरेका थिए। उनले अमेरिकी विदेश मन्त्रालयको सचिवालय, अपरेसन सेन्टरलगायत विभिन्न ठाउँमा काम गरेका छन्।
मेरिल्यान्ड स्कुल अफ पब्लिक अफेयर्सबाट सार्वजनिक व्यवस्थापनमा एमए गरेका थम्पसनले नेसनल वार कलेजबाट राष्ट्रिय सुरक्षा रणनीतिमा एमएस गरेका छन्। उनले स्प्रींगफिल्ड ओहायोको विटेनबर्ग युनिभर्सिटीबाट बीए गरेका थिए ।