‘रुटिन अफ नेपाल बन्द’लाई बालेनले छुट्टाए महानगरबाट १ करोड !
प्रकाशित मिति : असार ३०, २०७९ बिहीबार
काठमाडौँ महानगरपालिकाका मेयर बालेन्द्र साह (बालेन)लाई निर्वाचनमा अनलाइन र सामाजिक सञ्जालको प्रयोग गरी सघाउने ‘रुटिन अफ नेपाल बन्द’लाई एक करोड बजेट विनियोजन गरिएको समाचार नेपालका संचारमाध्यमहरुले प्रकाशित गरेका छन् । एबीसी टेलिभिजनका अनुशार नगरपरिषद् बैठकले पारित गरी छपाइका क्रममा रहेको बजेट पुस्तिकाका अनुसार मेयर साहले आफ्नै निजी खर्चले बनाउने भनेको अनिल अधिकारी (यमबुद्ध)को सालिकका लागि पनि महानगरकै १५ लाख रुपैयाँ विनियोजन गरिएको छ ।
सुरुम ‘हिमालयन टेलिभिजन’ ले रुटिन अफ नेपाल बन्दकै लागि भनेर मेयर बालेनले एक करोड रुपैयाँ छुट्टाएको दाबीसहित भिडिओ सामग्री सम्प्रेषण गरेको थियो । तर रुटिन अफ नेपाल बन्दका सञ्चालक भिक्टर पौडेलले सामाजिक सञ्जाल मार्फत उक्त समाचारको खण्डन गरेका छन् ।
उनले लेखेका छन्, ‘प्रिय हिमालयन टेलिभिजन म एउटा इ-स्पोर्ट टिमको सह-स्थापक हुँ , आयोजक हैन रुटिन अफ नेपाल बन्द र डिआरएस कम्पनीको कुनै सम्बन्ध छैन, ‘उनी थप्छन्, ‘बेइज्जत नै गर्ने भए ‘लजिक’ दिएर गर्नु प्रमाणित गर्नुहोस्, सबै आफू जस्तो हुन्छ्न् भनेर नसोच्नुहोला।’
हाल नेपालमा ‘ई-स्पोर्ट’ सञ्चालनको लागि आधिकारिक कम्पनीको रूपमा रुटिन अफ नेपाल बन्दका सञ्चालक भिक्टर पौडेल समेत सहभागी रहेको डिआरएस नामक कम्पनी मात्र दर्ता रहेको जनाइएको छ।
महानगरपालिकाबाट ई–स्पोर्ट्स (मोबाइल गेम) प्रतियोगिता आयोजना गर्न एक करोड रुपैयाँ विनियोजन गरिएको हो । महानगरपालिकाको बजेट तथा कार्यक्रमको मस्यौदाको ८८२ नम्बरको बुँदामा खेल आयोजना गर्न उक्त रकम विनियोजन भएको प्रमाण हेर्न सकिन्छ ।