नासाको १० बिलियनको टेलिस्कोपबाट खिचिएका विश्वलाई रोमाञ्चित बनाउने ५ तस्वीर
प्रकाशित मिति : असार २८, २०७९ मंगलबार
नासाले बहुप्रतिक्षित १० बिलियन डलरको जेम्स वेब स्पेस टेलिस्कोपबाट बनाइएका ब्रम्हाण्डका थप रोचक तस्वीरहरु सार्वजनिक गरेको छ । सोमबार पहिलो पूर्ण रंगिन तस्वीर सार्वजनिक गरेको नासाले मंगलबार थप रोचक तस्वीरहरु सार्वजनिक गरेको छ ।
कस्मिक क्लिफहरूमा धुलो र ग्यासको पर्दा पछाडि पहिले साना ताराहरु लुकेको अवस्थामा रहेका थिए । तर अब वेब टेलिस्कोपबाट लिइएको तस्वीरमा ती साना ताराहरु पनि देखिएका छन् ।
त्यस्तै अर्को तस्वीरमा ५ वटा ग्यालेक्सीहरू देख्न सकिन्छ । बायाँतिरको ग्यालेक्सी वास्तवमा पृथ्वीसँग बाँकी समूहको तुलनामा धेरै नजिक छ । यी टकराउने आकाशगंगाहरू गुरुत्वाकर्षण नृत्यमा एकअर्कालाई तानिरहेका छन्। वेब टेलिस्कोपले तारा निर्माणबारे मानव ज्ञानमा क्रान्तिकारी परिवर्तन गर्ने नासाको भनाई छ ।
यो तस्वीरलाई वेब टेलिस्कोपको अहिलेसम्मको सबैभन्दा रंगीन ठूलो तस्वीर बताइएको छ । जसले चन्द्रमाको व्यासको ५ भागको एकभाग आकाशको क्षेत्र कभर गर्दछ। यो तस्वीरमा १५० मिलियन भन्दा धेरै पिक्सल रहेको छ भने झण्डै एकहजार तस्वीर फाइलहरूबाट यो निर्माण गरिएको छ।
त्यस्तै ताराका दुईवटा रोचक तस्वीर पनि सार्वजनिक गरिएको छ । जसमा एउटा अक्षमा सानो, चम्किलो ताराको साथमा अर्को ग्यास र धुलो निकाल्ने मधुरो र निभ्दै गरेको तारा रहेको छ । वेव टेलिस्कोपले पहिलो पटक निभ्दै गरेको तारा धुलोमा लपेटिएको खुलासा गरेको छ।
एउता टस्वीरमा नेबुलालाई नजिकको इन्फ्रारेडमा देखाइएको छ भने अर्को तस्वीरमा उही नेबुलालाई मध्य इन्फ्रारेडमा देखाइएको छ । चम्किलो धुलोले तस्वीरलाई अझ रोचक देखाएको छ । नयाँ तस्वीरहरुले ताराहरू कसरी विकसित हुन्छन् र तिनीहरूको वातावरणलाई प्रभाव पार्छन् भन्ने पूरानो बुझाइलाई परिवर्तन गर्नेछ।
सोमबार राष्ट्रपति जो बाइडेनले वेब टेलिस्कोपबाट तयार पारिएको आकाशगंगाका प्रकाशहरुलाई समेटिएको पहिलो रोचक तस्वीर सार्वजनिक गरेका थिए । उक्त तस्वीरले आकाशगंगाका समूह देखाएको छ । टाढाका बस्तुलाई समेत ठूलो आकारमा देखाउने टेलिस्कोपबाट खिचिएको यो तस्वीर ब्रह्माण्डको सबैभन्दा उच्च रिजोल्युसनको तस्वीर हो ।
सबै: तस्वीर नासा