शिकागोमा स्वतन्त्रता दिवसको परेडमा गोली चल्यो, ६ जनाको मृत्यु, २ दर्जन घाइते
प्रकाशित मिति : असार २०, २०७९ सोमबार
अमेरिकाको शिकागोमा स्वतन्त्रता दिवसको परेडमा गोली चल्दा कम्तीमा ६ जनाको मृत्यु भएको छ । गोलीकाण्डमा २ दर्जनभन्दा धेरै घाइते भएका छन् ।
सोमबार हाइल्याण्ड पार्कमा फोर्थ जुलाईको परेड सुरु भएको १० मिनेटपछि बन्दुकधारीले नजिकैको घरको छानोबाट गोली चलाउन सुरु गरेको थियो । बन्दुकधारी अहिलेसम्म फरार रहेको जनाइएको छ ।
नर्थशोर युनिभर्सिटी हेल्थ सिस्टमले गोली लागेका २६ जनालाई हाइल्याण्ड पार्क अस्पताल लगिएको र ५ जनालाई इभान्सटन अस्पताल लगिएको जनाएको छ । अस्पताल लगिएकामध्ये अधिकांश गोली लागेर र केही भागदौडमा घाइते भएका छन् ।
गोली चलाउने १८ देखि २० बर्षभित्रको टिसर्ट लगाएको श्वेत व्यक्ति रहेको प्रहरीले जनाएको छ । घटनास्थलबाट राइफल बरामद गरिएको छ ।