घरको पोखरीमा शव भेटिएपछि महिलाबाट कुटिए पूर्वजर्नेल
प्रकाशित मिति : असार १४, २०७४ बुधबार
इटहरीमा महिलाबाट किन कुटिए पूर्वजर्नेल ? लोकान्तरमा बिराट अनुपमको रिपोर्ट ।
सोमबार इटहरीमा एक महिलाको विभत्स अवस्थाको शव सामाजिक संजालमा भाइरल भयो ।
इटहरी ४ स्थित कचना स्कुल छेउको अर्गानिक भिलेज रिसोर्टको पोखरीमा डुबेर मृत्यु भएको भनिएको सवलाई सबैभन्दा पहिले सामाजिक संजालमा हालेका थिए- नेविसंघ सुनसरी क्षेत्र नम्बर दुईका सभापति टंक दाहालले ।
पहिलो संविधानसभाका समानुपातिक सभासद तथा नेपाली सेनाका पूर्व जर्नेल कुमार फुदुङको घरको पोखरीमा भएको उक्त शव प्रकरणलाई धेरैले हत्या र केहिले आत्महत्या भनि टिकाटिप्पणी गरे ।
सोहि महिलाको शवको विषयलाई लिएर मंगलबार बिहान एघार बजेदेखि इलाका प्रहरी कार्यालय इटहरीमा दर्जनौँ महिलाहरुले प्रदर्शन गरे भने घटनाको छानबिन र दोषीमाथि कारबाहीको माग गरे । प्रहरीले भने घटनबारे जाहेरी नआएको तर व्यक्तिको निजी पोखरीमा महिलाको शब भेटिएकोले छानबिन गर्ने प्रतिबद्धता जनायो ।
यता स्थानीय प्रहरी कार्यालयमा दलका प्रतिनिधि र विरोधकर्ताहरुले प्रहरीसँग वार्ता गरेकै समयमा कुमारको इटहरी चारमा रहेको घरमा अर्को महिलाको समुह प्रवेश परि उनीमाथि हातपात गरेका छन् ।
कुटपिटबाट फुदुङको अनुहार र शरिरका विभिन्न भागमा चोट लागेको प्रत्यक्षदर्शीले बताएका छन् । पूर्व जर्नेल भएकै कारण उनीमाथि छानबिन नभएको महिलाहरुको आरोप छ । सोहि आक्रोशमा उनीहरु घरभित्र प्रवेश गरी कुटपीटमा उत्रिएको बताइएको छ । यस्तै उनीहरुले दिनभरि नै नारा, जुलुस र चक्काजामसमेत गरेका थिए |
इलाका प्रहरी कार्यालय इटहरीका डिएसपी नरेश सुवेदीका अनुसार घाइते कुमारलाई धरानको विपी कोइराला स्वास्थ्य विज्ञान प्रतिष्ठानमा उपचारका लागी साँझ पाँच बजे पुर्याइएको छ ।
जर्नेल फुुदुङको निजी पोखरीमा मृत अवस्थामा भेटिएकि भनिएकी महिला गोर्खा जिल्ला निवासी सुजीता शाही ठकुरी भएको खुलेको छ । उनी रिसोर्टमा काम गर्ने पुर्व कर्मचारी समेत हुन् ।
डिएसपी नरेश सुवेदीले मृतकको पोस्टमार्टम रिपोर्ट र थप स्थलगत अध्ययन पछि सबै कुरा बाहिर आउँने बताए ।