Follow @khasokhasmag

३० बर्षदेखिका न्युयोर्क राज्य सांसद काहिललाई सराहना श्रेष्ठको चुनौति, श्रेष्ठसँग १७ हजार डलर बढी फण्ड


प्रकाशित मिति : जेष्ठ २६, २०७९ बिहीबार

न्युयोर्क राज्यको संसदको तल्लो सदनका लागि हुने १०३ नम्बर एसेम्ब्ली डिस्ट्रिक्टको प्राइमरी चुनाव रोचक बन्दै गएको छ । झण्डै ३० बर्षदेखि न्युयोर्क संसदको तल्लो सदनमा प्रतिनिधित्व गर्दै आएका र ४० बर्षभन्दा लामोसमयदेखि राजनीतिमा सकृय ६६ बर्षका डेमोक्रेटिक उम्मेदबार केभिन काहिललाई ४१ बर्षकी सराहना श्रेष्ठको चुनौति थाम्न मुस्किल भइरहेको छ ।

आगामी जुन २८ मा हुने प्राइमरीमा काहिल र श्रेष्ठबीच प्रतिस्पर्धा हुनेछ भने प्राइमरीबाट विजेता हुने उम्मेदबार आगामी नोभेम्बरमा हुने अन्तिम चुनावमा न्युयोर्क राज्य संसदको तल्लो सदनका लागि प्रतिस्पर्धा गर्नेछन् । यद्यपी प्राइमरी चुनावमा जितेका डेमोक्रेटिक उम्मेदबारले नोभेम्बरमा हुने चुनाव जित्ने लगभग निश्चित रहनेछ । जुन २८ को प्राइमरीका लागि जुन १८ बाट अग्रिम मतदान सुरु हुनेछ ।

प्राइमरी चुनाव आउन झण्डै तीनसाता बाँकी रहँदा श्रेष्ठसँग काहिलको तुलनामा झण्डै १७ हजार डलर बढी फण्ड रहेको देखिएको छ । यद्यपी सराहना श्रेष्ठको तुलनामा काहिलले चुनावमा धेरै रकम उठाउने र खर्च गर्ने गरेको देखिएको छ । पछिल्लो फाइलिङ अनुशार काहिलसँग ५२ हजार ६ सय ३१ डलर बाँकी फण्ड देखिएको छ भने श्रेष्ठसँग ६९ हजार ३ सय ७७ डलर रहेको छ । जुन काहिलसँग भएको फण्डको तुलनामा १६ हजार ७ सय ४६ डलर बढी हो ।

अहिले आफ्नो १५ औं कार्यकाल सम्हालिरहेका काहिलले चुनावी अभियान सुरु गर्दा उनीसँग ३७ हजार ७ सय ५३ डलर रहेको थियो भने उनले १ लाख १६ हजार १ सय ९६ डलर फण्डरेज गरेका छन् । जसमध्ये मे २७ सम्म उनले १ लाख १ हजार ३ सय १९ डलर खर्च गरिसकेका छन् । पछिल्लो फाइलिङ अनुशार श्रेष्ठले चुनावी अभियान सुरु गर्दा उनीसँग ५३ हजार ७ सय ४४ डलर थियो भने उनले ७४ हजार ५ सय ४३ डलर फण्डरेज गरेकी थिइन् । उनले ५८ हजार ९ सय १० डलर खर्च गरिसकेकी छिन् ।

काहिलले २७ जनाबाट सिधा व्यक्तिगत डोनेशन प्राप्त गरेका छन् भने श्रेष्ठले १९०८ जनाबाट सिधा व्यक्तिगत डोनेशन प्राप्त गरेकी छिन् । काहिलले एक्टब्लुमार्फत प्राप्त गरेको व्यक्तिगत डोनेशन रिपोर्टमा समावेश छैन । श्रेष्ठले ३४३ जना बु्रकलिन निवासीहरुबाट डोनेशन प्राप्त गरेकी छिन् । आफ्नो चुनावी क्षेत्रबाट पनि डोनेशन प्राप्त गरेकी उनले न्युयोर्क राज्यबाहिरबाट समेत डोनेशन प्राप्त गरेकी छिन् ।

श्रेष्ठ न्युयोर्क राज्यको संसदमा उम्मेदबारीको घोषणा गर्ने नेपाली मूलकी पहिलो अमेरिकन हुन् । उनले यो निर्वाचन जितेको खण्डमा अमेरिकाको राजनीतिमा सबैभन्दा उच्च तहमा पुग्ने  नेपाली मूलकी पहिलो महिला हुनेछिन् ।

जलवायु संकट र आर्थिक तथा सामाजिक न्यायका विषयमा आवाज उठाउदै आएकी उनले न्युयोर्क अल्स्टर र डचेज काउन्टीको प्रतिनिधित्व गर्ने क्षेत्रबाट उम्मेदबारीको घोषणा गरेकी हुन् । श्रेष्ठलाई डेमोक्रेटिक सोसलिष्टको हडसन भ्याली च्याप्टरले इन्डोर्स गरेको थियो ।

श्रेष्ठले गतबर्ष नै  चुनावी अभियान सुरु गरेकी थिइन् । श्रेष्ठले न्युयोर्क हेल्थ एक्ट, गुड कज इभिक्सन र ग्रिन न्यु डिलजस्ता बामपन्थी एजेण्डाहरुको समर्थन गरेकी छिन् । डेमोक्रेटिक सोसलिष्टको हडसन भ्याली च्याप्टर र फर द मेनी नामको समुहले श्रेष्ठको उम्मेदबारीको समर्थन गरेका थिए ।

उनको उम्मेदबारीको चर्चित अमेरिकन सांसद अलेक्जान्ड्रिया ओकासिओ कोर्टेजले पनि समर्थन गरिसकेकी छिन् । त्यस्तै अमेरिकन चर्चित कलाकार र अधिकारकर्मी सिन्थिया निक्सनले पनि उनको उम्मेदबारीको समर्थन गरेकी छिन् ।

श्रेष्ठ अमेरिकामा डेमोक्रेटिक सोसलिष्टकी सदस्य समेत हुन् भने उनी डेमोक्रेटिक सोसलिष्टको मिड हड्सन भ्याली च्याप्टरका लागि अल्स्टर काउन्टी सह अध्यक्ष समेत हुन् । त्यस्तै उनी स्वच्छ, नवीकरणीय, किफायती र पहुचयोग्य विद्युत आपूर्तिको प्रवद्र्धनका क्षेत्रमा काम गर्ने गठबन्धन पब्लिक पावर न्युयोर्ककी नेता समेत हुन् ।

न्युयोर्क राज्यको तल्लो सदनमा हरेक सांसदले झण्डै १ लाख ३० हजार बासिन्दाको प्रतिनिधित्व गर्दै आएका छन् । न्युयोर्क राज्य संसदको तल्लो सदनमा प्रतिनिधित्व गर्ने सांसदको कार्यकाल २ बर्षको हुने गर्छ । सन् २०२० को डेमोक्रेटिक प्राइमरी रद्द गरिएको थियो भने चुनावमा केभिन काहिलले ५१ हजार २ सय ३४ मत ल्याएर विजय भएका थिए ।

केभिनले डिस्ट्रिक्ट १०३ बाट सन् २०१२ देखिका चुनावमा लगातार जित्दै आएका छन् । त्योभन्दा अगाडि उनले डिस्ट्रिक्ट १०१ बाट सन् १९९८ देखि २०१० सम्म जित्दै आएका थिए । त्योभन्दा अगाडि उनले सन् १९९२ बाट पनि उक्त क्षेत्रबाट न्युयोर्क राज्य संसदको तल्लो सदनमा चुनाव जितेका थिए ।

सन् २००१ मा अध्ययनका लागि न्युयोर्क आएकी श्रेष्ठ ग्राफिक डिजाइनरका रुपमा काम गर्दा गर्दै नेपालमा लोकतन्त्रका पक्षमा समेत वकालत गरेकी थिइन् । उनले संचालन गरेको अनलाइन साहित्य जर्नलमा प्रकाशित राजनीतिक लेखका कारण तत्कालिन राजतन्त्रले उनको अनलाइनमाथि नेपालमा प्रतिबन्ध समेत लगाएको थियो । श्रेष्ठले सन् २०१९ मा अमेरिकन नागरिकता प्राप्त गरेकी थिइन् ।

पछिल्लो समयमा अमेरिकन मुलधारको राजनीतिमा नेपाली अमेरिकनहरुको सहभागिता बढ्दै गएको छ । जननिर्वाचित सबैभन्दा उच्च पदमा पुग्न सफल नेपाली अमेरिकन मेरिल्याण्ड राज्यका सांसद ह्यारी भण्डारी हुन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com