अमेरिकाको लाइसेन्स हुनेले नेपालसहित १८० देशमा गाडी चलाउन यसरी निकाल्न सकिन्छ अन्तराष्ट्रिय परमिट
प्रकाशित मिति : श्रावण २३, २०८० मंगलबार
अमेरिकाको ड्राइभर लाइसेन्स हुनेले नेपालसहित १८० देशमा गाडी चलाउन अन्तराष्ट्रिय ड्राइभिङ्ग परमिट निकाल्न सकिन्छ । विश्वका धेरैजसो देशहरूमा लाइसेन्स र विमा बिना गाडी चलाउनु गैरकानुनी हुने भएकाले अमेरिकाबाहिर यात्रा गर्दा गाडी चलाउने योजनामा हुनुहुन्छ भने अमेरिकी ड्राइभर लाइसेन्सका साथमा अन्तराष्ट्रिय ड्राइभिङ्ग परमिट निकाल्नु उपयुक्त हुन्छ ।
धेरै देशहरूले अमेरिकी ड्राइभर लाइसेन्सलाई मान्यता दिँदैनन् तर अन्तर्राष्ट्रिय ड्राइभिङ परमिट भने स्वीकार गर्छन् । नेपालले अमेरिकी ड्राइभर लाइसेन्सको रुपान्तरण गर्न रोकेको छ । तर नेपालले अन्तर्राष्ट्रिय ड्राइभिङ परमिट भने स्वीकार गर्छ ।
अमेरिकी सरकारले अटोमोबाइल एसोसिएसनलाई अन्तर्राष्ट्रिय ड्राइभिङ परमिट जारी गर्नका लागि अनुमति दिएको छ । अमेरिकन अटोमोबाइल एसोसिएसनमार्फत अन्तर्राष्ट्रिय ड्राइभिङ परमिट निकाल्न सकिन्छ ।
नेपालले सन् १९४९ को महासन्धीमा हस्ताक्षर नगरेपनि अन्तर्राष्ट्रिय ड्राइभिङ परमिट भने स्वीकार गर्छ । अंगोला, अर्मेनिया, बु्रनाई, भुटान लगायतका कैयन देशहरुले अन्तर्राष्ट्रिय ड्राइभिङ परमिट स्वीकार गर्छन् । दक्षिण अमेरिकाका ब्राजिल र उरुग्वे बाहेक अन्य देशहरुले अन्तर्राष्ट्रिय ड्राइभिङ परमिट स्वीकार गर्छन् ।
अमेरिकन अटोमोबाइल एसोसिएसनमार्फत अन्तर्राष्ट्रिय ड्राइभिङ परमिट प्राप्त गर्नका लागि व्यक्तिगत रुपमा उपस्थीत भएर वा हुलाकमार्फत आवेदन पठाउन सकिन्छ । व्यक्तिगत रुपमा उपस्थीत हुनेहरुले आवेदन फारम भरेर नजिकको शाखामा जानुपर्छ । दुईवटा पासपोर्ट साइजको फोटो, अमेरिकाको ड्राइभर लाइसेन्स र २० डलर शुल्क तिरेपछि अन्तर्राष्ट्रिय ड्राइभिङ परमिट प्राप्त गर्न सकिन्छ ।
आवेदन फारम भर्नका लागि यहाँ क्लीक गर्नुहोला ।
हुलामार्फत आवेदन दिनेहरुले आवेदन फारम भरेर दुईवटा पासपोर्ट साइजको फोटो, ड्राइभर लाइसेन्सको फोटोकपी र २० डलर मनी अर्डर वा चेक हुलाकमार्फत पठाउनुपर्छ । दुबै तस्वीरको पछाडि हस्ताक्षर गरेको हुनुपर्छ । दु्रत गतिको हुलाक सेवा प्राप्त गर्नका लागि अतिरिक्त शुल्क तिर्नुपर्छ ।
शाखामा उपस्थीत हुनका लागि नजिकको शाखा पत्ता लगाउन यहाँ क्लीक गर्नुहोला ।
हुलाकमार्फत कुन शाखामा पठाउने भन्ने थाहा पाउन यहाँ क्लीक गर्नुहोला । शुल्क कसरी तिर्ने लगायतका विवरण थाहा पाउन ती शाखाहरुमा फोनबाट पनि सम्पर्क गर्न सकिन्छ ।
कोरोना महामारीका कारण कार्यालयहरु बन्द रहन सक्ने भएकाले त्यहाँ जानु अगाडि फोन सम्पर्क गरेर बुझ्न सकिनेछ ।