क्यलिफोर्नियाको एउटा स्टेशनमा पेट्रोलको मूल्य १० डलर प्रति ग्यालेन, न्युयोर्क सिटीमा नाघ्यो ५ डलर
प्रकाशित मिति : जेष्ठ २१, २०७९ शनिबार
अमेरिकाको न्युयोर्क सिटीका अधिकांश ग्यास स्टेशनमा पेट्रोलको मूल्य प्रति ग्यालेन ५ डलरभन्दा बढी भएको छ भने क्यालिफोर्नियाको एउटा ग्यास स्टेशनमा झण्डै १० डलर प्रति ग्यालेन पुगेको छ । सान फ्रान्सिस्कोबाट १७५ माइल उत्तरमा रहेको मेन्डिसिनोमा अवस्थित शेभरोन ग्यास स्टेशनमा पेट्रोलको मूल्य ९ डलर ६० सेन्टस प्रति ग्यालेन पुगेको छ ।
क्यालिफोर्नियामा औषत पेट्रोलको मूल्य भन्दा उक्त ग्यास स्टेशनमा पेट्रोलको मूल्य झण्डै ३ डलर प्रति ग्यालेनले बढी हो । क्यालिफोर्नियामा औषत मूल्य ६ डलर ३० सेन्टस प्रति ग्यालेन पुगेको छ । कुनै ग्यास स्टेशनमा केही सस्तो रहेको छ भने केहीमा महँगो रहेको छ । लस एन्जलसको शेभरन ग्यास स्टेशनमा नियमित पेट्रोलको मूल्य ८ डलर ५ सेन्टस प्रति ग्यालेन पुगेको छ ।
ग्यास बडीका अनुशार औषतमा वासिंटन राज्यमा औषत ५ डलर २३ सेन्टस, ओरेगनमा ५ डलर २३ सेन्टस, इलिनोयमा ५ डलर २४ सेन्टस, अलास्कामा ५ डलर २५ सेन्टस, नेभाडामा ५ डलर ३२ सेन्टस, हवाईमा ५ डलर ४१ सेन्टस र क्यालिफोर्नियामा ६ डलर ३० सेन्टस प्रति ग्यालेन पुगेको छ ।
सन् २०२१ को जनवरीमा डोनाल्ड ट्रम्पको कार्यकालको अन्तिम महिनामा अमेरिकामा पेट्रोलको मूल्य औषतमा प्रति ग्यालेन २ डलर ४१ सेन्टस रहेको थियो भने कतिपय राज्यमा २ डलरभन्दा पनि कम रहेको थियो ।