न्युयोर्कको नवनिर्मित संसदीय क्षेत्रबाट पूर्व मेयर ब्लाजिओले संघीय संसदमा उम्मेदबारी दिने
प्रकाशित मिति : जेष्ठ ६, २०७९ शुक्रबार
न्युयोर्कको नवनिर्मित संसदीय क्षेत्रबाट न्युयोर्क सिटीका पूर्व मेयर बिल ब्लाजिओले संघीय संसदको प्रतिनिधिसभा सदस्यका लागि उम्मेदबारी दिने घोषणा गरेका छन् । बु्रकलिन र म्यानहटनका केही भाग समेटेर बनाइएको उक्त संसदीय क्षेत्रमा ब्लाजिओले भींडभाडयुक्त डेमोक्रेटिक प्राइमरीमा उम्मेदबारी दिने भएका हुन् ।
मेयरको दुई कार्यकाल समाप्त गरेपछि अत्यन्तै कम स्वीकृति दरका साथ कार्यकाल पूरा गरेका उनले नयाँ रेखांकन गरिएको संसदीय सिटका लागि मैदानमा होमिएका हुन् । न्युयोर्क सिटीको मुटुमा रहेको यो संसदीय क्षेत्रलाई डेमोक्र्याट्सहरुका लागि चुनाव जित्न सुरक्षित स्थान मानिएको छ ।
६१ बर्षका ब्लाजिआले शुक्रबार एमएसएनबीसीको टेलिभिजन कार्यक्रम मार्फत आफू चुनावमा जाने बताएका हुन् । उनले सन् २०२० को राष्ट्रपति चुनावमा डेमोक्रेटिक प्राइमरीमा समेत उम्मेदबारी दिएका थिए ।
अगस्त २३ मा हुने प्राइमरी अगाडि कैयन डेमोक्र्याट्सहरुले उम्मेदबारीका लागि रुची देखाइसकेका छन् । जुनमा हुने तय भएको प्राइमरी अगस्तका लागि सारिएको हो । राज्य संसदका सिनेटर ब्राड होयलम्यान, सिम्चा फेल्डर, राज्यको तल्लो सदनका सदस्यहरु यु लाइन निउ, रोबर्ट क्यारोल, जो साइमन लगायतले पनि उम्मेदबारी दिने बताइसकेका छन् ।