गैरकानूनी रुपमा पैसा लुकाउनका लागि अमेरिका ‘नम्बर वान’ गन्तव्य
प्रकाशित मिति : जेष्ठ ४, २०७९ बुधबार
गैरकानूनी रुपमा पैसा लुकाउनका लागि अमेरिका शीर्ष गन्तव्य रहेको एक रिपोर्टले देखाएको छ । ट्याक्स जस्टिस नेटवर्कको आर्थिक गोप्य सुचकांकमा अमेरिका पहिलो नम्बरमा परेको हो ।
यो बर्ष अमेरिका पहिलोपटक पहिलो नम्बरमा परेको हो । परम्पारगत ट्याक्सका आश्रयस्थलहरु सिंगापुर, स्वीटजरल्याण्ड, लक्जेम्बर्ग भन्दा पनि अमेरिका माथि परेको हो । ट्याक्स छल्न अमेरिकीहरुले बैंक खाताहरु खोलेको केमन आइल्याण्ड १४ नम्बरमा परेको छ ।
अमेरिका जे कुरामा पनि आफू नम्बर वान हुन चाहेपनि यो भने नचाहेको विषयमा नम्बर वान हुन पुगेको फ्याक्ट गठबन्धनका कार्यकारी निर्देशक आयन गेरीले भने । युक्रेनमा रुसको आक्रमण भइरहँदा अमेरिकाले रुसका धनी बर्गको सम्पत्तिमाथि कारवाही गरेको बेला यो निष्कर्ष आएको हो ।
फ्याक्ट गठबन्धनले विश्वका १ सय ५१ वटा देशको आर्थिक नियमको परीक्षण गरेर यो निष्कर्ष निकालेको हो । नयाँ एन्टी मनी लण्डरिङ कानून लागु गर्न अर्थ मन्त्रालयको कोषमा रकम अभाव हुनु अमेरिका पहिलो नम्बरमा पर्ने कारण रहेको बताइएको छ ।
अमेरिकाभित्र कति रकम लुकाइएको छ भन्ने प्रष्ट छैन । तर अर्थ मन्त्रालयले कुल ग्राहस्थ उत्पादनको २ प्रतिशत यसरी लुकाइएको बताएको थियो । जुन झण्डै ४ सय ८० बिलियन डलर हो ।
अन्य देशहरुमा स्वीटजरल्याण्ड दोश्रो, सिंगापुर तेश्रो, हङकङ चौथो, लक्जेम्बर्ग पाँचौं, जापान छैठौं, जर्मनी सातौं, युएई आठौं नम्बरमा रहेका छन् ।
सम्पूर्ण सुची हेर्न यहाँ क्लीक गर्नुहोला ।