जापानमा एकजनालाई झुक्किएर साढे ३ लाख डलर कोभिड सहायता, सबै रकम जुवामा स्वाहा
प्रकाशित मिति : जेष्ठ ४, २०७९ बुधबार
जापानमा एकजना स्वाथ्यकर्मीलाई झुक्किएर झण्डै साढे ३ लाख अमेरिकी डलर (झण्डै ४६ मिलियन यन) कोभिड सहायता रकम पठाइएको छ । सिंगै टाउनका लागि पठाउनुपर्ने उक्त रकम एउटै व्यक्तिका खातामा गएको हो ।
२४ बर्षका ती व्यक्तिले यसरी आएको रकम फिर्ता गर्नुको साटो अनलाइनबाट जुवा खेलेर सकेको उनका वकिलले बताएका छन् । पश्चिमी जापानको अबुमा पर्ने एउटा टाउनका ती व्यक्तिको खातामा झण्डै ४६ मिलियन यन आएको थियो ।
उनले जम्मा ७७४ डलर मात्र प्राप्त गर्नुपर्ने भएपनि उनको खातामा सिंगै टाउनका बासिन्दालाई दिनुपर्ने रकम गएको हो । उक्त रकम अबुका कम आम्दानी भएका ४६३ परिवारलाई पठाउनुपर्ने थियो ।
तर सुचीको सबैभन्दा माथि नाम भएका ती व्यक्तिका खातामा सबै रकम गएको थियो । रकम पाएको दुईसाताभित्र उनले अनलाइनमा जुवा खेलेर उक्त रकम सकेको दावी गरिएको छ ।
रकम सकिएपछि ती व्यक्तिले उक्त रकम फिर्ता गर्न नसक्ने अवस्थामा रहेको जनाइएको छ । यद्यपी उनले आफूले रकम फिर्ता गर्ने बताएका छन् । अबु टाउनले पनि रकम फिर्ता गराउन माग गर्दै मुद्दा दायर गरेको छ ।