न्युयोर्क सिटीमा कोरोनाको जोखिम बढेपछि हाईअलर्ट जारी, स्वास्थ्य विभागका ६ सुझाव
प्रकाशित मिति : जेष्ठ ३, २०७९ मंगलबार
न्युयोर्क सिटीमा कोरोनाको जोखिम बढेको न्युयोर्क सिटीको स्वास्थ्य विभागले जनाएको छ । न्युयोर्कको कोभिड १९ को अलर्ट स्तर मध्यमबाट उच्च पुगेको र विगतको तुलानामा जोखिम बढेको जनाइएको छ ।
झण्डै दुईसाता अगाडिमात्र मध्यम अलर्ट जारी गरिएकोमा कोरोना जोखिम बढेपछि मंगलबार हाइ अलर्ट जारी गरिएको छ । न्युयोर्क सिटीमा कोभिड १९ का ४ प्रकारका अलर्टहरु जारी गरिदै आएका छन् । सबैभन्दा कम सामुदायिक फैलावटको जोखिम रहेको अवस्थामा न्यून, मध्यम फैलावटको जोखिम भएको अवस्थामा मध्यम, उच्च जोखिम भएको अवस्थामा उच्च र अति उच्च जोखिम भएको अवस्थामा अति उच्च स्तरसहित अलर्ट जारी गरिन्छ ।
अहिले हाई अलर्ट जारी गरेको अवस्थामा कोरोनाबिरुद्धको भ्याक्सिन र बुस्टर डोज लगाउन सुझाव दिइएको छ । ५ बर्ष र त्यो भन्दा माथिका उमेरका सबैका लागि भ्याक्सिन उपलब्ध रहेको छ ।
त्यस्तै सबै भित्र र बाहिरका सार्वजनिक स्थलमा मास्क लगाउन भनिएको छ । बाहिरका भींडभाढयुक्त स्थानमा पनि मास्क लगाउन भनिएको छ । सर्जिकल मास्कको माथि कपडाको मास्क लगाउन वा केएन ९५, के एफ ९४, एन ९५ जस्ता उच्च गुणस्तरका मास्क लगाउन सुझाव दिइएको छ । उच्च गुणस्तरका मास्कहरु उच्च जोखिममा रहेका, ६५ बर्ष माथिकाहरु र भ्याक्सिन नलगाएकाहरुका लागि धेरै फाइदाजनक रहेका छन् ।
त्यस्तै भींडभाडयुक्त स्थलमा नजान र अतिरिक्त सावधानीहरु अपनाउन सुझाव दिइएको छ । घरभित्र पनि ठूला जमघटहरु नगर्न र भेटघाटहरु सानो संख्यामा सिमित गर्न सुझाव दिइएको छ ।
लक्षण भएको खण्डमा, संक्रमितको संसर्गमा गएको खण्डमा, यात्रा गरेको खण्डमा र भींडभाडमा गएको खण्डमा कोरोना परीक्षण गराउन सुझाव दिइएको छ । बिरामी भएको खण्डमा घरमै बस्न सुझाव दिइएको छ । त्यस्तै बारम्बार कम्तीमा २० सेकेण्ड साबुनपानीले हात धुन वा स्यानिटाइजरको प्रयोग गर्न सुझाव दिइएको छ ।